Kesah Palui : Salop Tinggi
- 31 kali
Bini Palui aktif dalam berbagai kegiatan sosial dan sering tampil di depan umum, membuatnya ingin selalu tampil modis mengikuti tren. Ia meminta Palui membelikan salop tumit tinggi yang sedang populer. Meski keadaan keuangan pas-pasan, Palui berusaha memenuhi keinginan istrinya dengan membeli salop hasil kredit dari sapupu Tulamak. Setelah dipakai, istrinya tampak lebih cantik dan menarik perhatian banyak orang, bahkan ada laki-laki yang berusaha mendekatinya. Cemburu dan takut kehilangan, Palui akhirnya memotong tumit salop itu diam-diam. Dari situ, Palui sadar bahwa penampilan modis tidak selalu membawa kebahagiaan dalam rumah tangga.
Bini Palui itu tamasuk wanita karir jua. Katuju umpat baarisan, umpat maurusi posyandu, rancak umpat rapat di RT dan balai desa.
Karna rancak umpat kagiatan jadi banyak takawan dan batamuan urang, baik bubuhan urang biasa ataupun bubuhan urang sugih nang bapakaian macam-macam mudel.
Utumatis karna rancak talihat, marasa urang pina bengkeng maka kacar jua liur handak maumpati, lalu hujung-hujungnya batagihan ka laki.
“Lalu mauuuuuuukkk,” ujar Palui gagarunum saurangan.
“Napa dipander Lui, pina gagarunum saurangan,” ujar Garbus.
“Bibinian itu kada kawa malihat mudel-mudel nang hanyar lalu kacar haja liur handak umpat manuruti,” ujar Palui.
“Sayang bini itu sama wan sayang anak Lui ai. Kasihan kalu kada dikabulakan kahandaknya,” ujar Garbus.
“Sabujurnya handak haja mangabulakan tapi uncuinya nang kadada,” ujar Palui pina sadih.
“Bini handak napa Lui?” ujar Garbus manakuni.
“Biniku itu handak minta tukarakan salop tinggi tumit karna wayah ini ujarnya lagi ngetop,” ujar Palui.
“Sual mudel pakaian, baju, tapih, salendang, sipatu, sandal, salop, jam tangan kada kawa dituruti. Kalu dituruti tarus kada cagar kaduitan karna mudel itu lakas baganti-ganti,” ujar Tulamak nang hanyar datang pina manasihati.
“Bujur haja ujar ikam itu Mak ai makanya bini ikam disimpan dipingit di rumah haja, jadi kada malihat urang bapakaian macam-macam,” ujar Garbus malawanakan Palui.
“Biniku itu tamasuk tamasuk wanita karir Mak ai. Kasihan jua kalu hari-hari tatap haja tapih baju nang itu-itu tarus,” ujar Palui.
“Makanya biniku kusayangi dan kukurung tarus di rumah, kusuruh gawian macam-macam supaya kada manjangkit panyakit batatagih,” ujar Tulamak.
“Ikam itu Mak ai kada mahargai hak bibinian, karna haknya sama jua wan lalakian,” ujar Garbus.
“Bini ikam handak minta tukarakan napa Lui?” ujar Tulamak.
“Biniku handak minta tukarakan salop tumit tinggi,” sahut Palui mangaku tarus tarang.
“Gampang, kabalujuran aku ada baisian sapupu nang mangariditakan sipatu, sandal dan salop-salopan,” ujar Tulamak langsung mambawai palui tulak ka wadah sapupunya itu.
Kada lawas Palui kuting-kuting mambawa bungkusan salop tumit tinggi dan langsung manjulung kabininya supaya dipakai gasan saruan isuknya.
Himung banar Palui bininya basalop tumit tinggi. Bininya itu magin kalihatan langkar. Banyak urang marawa, banyak lalakian nang malilik. Malah kada saikung badua ada jua nang mambawai bakanalan lalu batakun di mana rumah wan numur talipun.
Rupanya malihat bininya itu babungas, Palui gaer jua kalu-kalu bininya itu tahilap-hilap lalu diambil urang. Isuknya diam-diam ditataknya tumit salop bininya itu.
“Tanyata mudel kada salalu cucuk gasan kaharmunisan laki bini,” ujar Palui gagarunum pulang wayah batamuan Garbus wan Tulamak. (ivd/mht)
Sumber: Banjarmasin Post Edisi Cetak, tanggal 20 Juli 2019
Bini Palui aktif dalam berbagai kegiatan sosial dan sering tampil di depan umum, membuatnya ingin selalu tampil modis mengikuti tren. Ia meminta Palui membelikan salop tumit tinggi yang sedang populer.…