Kesah Palui : Mintuha Panakutan

Palui baru menikah dan dikenal sangat patuh kepada mertuanya. Ia selalu menuruti perintah tanpa membantah, termasuk saat disuruh membersihkan kotoran misterius di halaman rumah. Hampir setiap pagi kotoran itu muncul lagi, membuat Palui penasaran. Ia berniat berjaga malam, tapi dilarang. Akhirnya Palui berakal dengan menutupi kotoran itu memakai daun jalatang agar pelakunya gatal dan bengkak. Mendengar rencana itu, mertuanya panik lalu mengaku bahwa dialah pelakunya karena takut ke jamban di tepi sungai saat malam. Palui tersenyum, menyadari ketaatannya justru membuat mertua malu sendiri.

*****

PALUI wayah hanyar kawin taat banar wan mintuha, bila handak bajalan atawa datang bajalanan pasti inya mancium tangan mintuhanya. Bila batamuan langsung haja batunduk, lakas banar manggawi napa haja bila disuruh mintuhanya.

“Ikam Lui bujuranlah handak sahidup-samati wan anakku?” ujar mintuhanya batakun.

“Hati ulun sudah mat banar cinta dan sayang wan anak sampiyan, kada haja imbah kawin ini tapi wayah bagagandakan dahulupun sudah kada kawa dipisah lagi. Makanya ulun kada jara-jaranya tiap imbah tarawih mailangi anak sampiyan itu walaupun sawat disariki dan disimbur banyu kulak pisang,” ujar Palui.

“Jangan diingatakan lagi kisah dahulu itu Lui ai, karna wayah itu aku mauji ikam. Kalu handak jadi minantu nang baik makanya jangan pa-anggapan bila disuruh mintuha,” ujar mintuhanya.

Mintuha Palui itu tamasuk urang nang pamburisit, kada pawanian apalagi bila malam kadap. Rumah mintuha Palui andaknya di pinggir sungai makanya bila mandi atawa bahira harus turun ka jamban di sungai. Sudah baminggu-minggu ini Palui disuruh mintuhanya mambarasihi tahi nang batuyuk di palatar rumahnya.

“Lui, ui Palui ujar mintuhanya mangiyau Palui, tulung barasihiakan tuyukan tahi ini. Aku hiran banar Lui ai siapa jua nang rancak bahira di palatar kita ini,” ujar mintuhanya.

“Mungkin kakanakan bagagayaan haja, tapi rasa kada mungkin pulang kakanakan karna tahinya adalah tahi tuha pina bacampur racakan lumbuk,” ujar Palui umpat manyumpah.

Baisukan isuknya ada pulang tuyukan tahi di halaman Palui. Lalu bakiyauan pulang mintuhanya minta barasihiakan.

“Mungkin ada urang nang sarik wan kita, makanya malam ini ulun handak maintipakannya,” ujar Palui.

“Kada usah di-intipakan Lui ai karna warga kita disini samunyaan baik-baik haja,” sahut mintuhanya.

“Kaya apa bila malam kita lampui,” ujar Palui mausulakan.

“Kada parlu karna babubuang minyak haja,” ujar mintuhanya.

Wayah baisukan isuknya, Palui disuruh pulang ulih mintuhanya mambarasihi tuyukan tahi itu, karna usulnya supaya bajaga dan ditarangi wan lampu itu kada ditarima mintuhanya maka Palui baucap:

“Ulun ada mandangar kaya apa cara mangatahui siapa nang mambahirai palatar kita ini,” ujar Palui.

“Kaya apa caranya Lui?” ujar mintuhanya batakun.

“Caranya nyaman banar, bila sudah dihalat wan tatamba itu maka urang nang mambahirai tadi cagar bagaru kagatalan, bangkak dan babisul sa-awakan sampai sabulanan. Caranya adalah……. tuyukan tahi itu ditukupi wan daun jalatang,” ujar Palui.

“Wah barat banar hukumannya,” ujar mintuha Palui sambil pina wirai mancangangi Palui. “Kalu kaya itu kada usah digawi haja Lui ai, tulung jangan digawi karna….. karna nang bahira dipalatar itu adalah aku saurang karna bila malam aku takutan bahira ka jamban,” ujar mintuhanya kasupanan. (mht/repro)

Sumber: Banjarmasin Post Edisi Cetak, tanggal 25 Juli 2019

Palui baru menikah dan dikenal sangat patuh kepada mertuanya. Ia selalu menuruti perintah tanpa membantah, termasuk saat disuruh membersihkan kotoran misterius di halaman rumah. Hampir setiap pagi kotoran itu muncul…