Kesah Palui : Hintalu Karuang
- 42 kali
Palui mempersiapkan kunjungan pejabat ke kampungnya dan meminta Garbus serta Tulamak menyiapkan minuman dan kue sederhana karena acara hanya sebentar. Namun karena salah paham, Garbus membawa telur ayam dan itik, sedangkan Tulamak datang membawa burung dalam kurungan. Palui terkejut dan malu ketika para tamu tiba, menyadari maksudnya “wadai hintalu karuang” diartikan secara harfiah oleh mereka. Ia menyesal tidak memberi penjelasan lebih jelas sejak awal. Palui pun menutupi kesalahpahaman itu sambil berusaha menjaga wibawa di depan para pejabat yang keheranan.
*****
SALAWAS jalanan sudah baaspal, raminya kampung Palui makin batambah. Satutumat ada kunjungan pajabat nang singah. Sampai sakali ini ada pajabat nang isuk handak singgah ka kampung Palui.
“Bus, isuk kita kadatangan tamu matan kabupaten,” ujar Palui mamanderi Garbus.
“Napa acaranya Lui?” ujar Garbus.
“Acaranya silaturahmi haja, karna bubuhan sidin-sidin itu handak maninjau panambangan,” ujar Palui.
“Di wadah kita ini kadada panambangan kanapa maka sidin maninjau,” ujar Garbus.
“Bubuhan sidin itu hanya umpat singgah haja, karna parjalanannya jauh maka baistirahat di sini umpat sambahyang Asyar,” ujar Palui manjalasakan.
“Kalu kaya itu kita siapakan makanan napa Lui?” Garbus batakun.
“Karna singgahnya satumat haja, maka kada usah makanan tapi kita sadiakan nginuman wan wadainya haja Bus ai,” ujar Palui.
“Wah, kalu sahibar nginuman haja kada asyik,” ujar Tulamak umpat bapander.
“Jangan dipandang asyiknya Mak ai, tapi demi mahimat duit marga. Wayahini zaman krismun,” ujar Palui.
“Napa wadainya Lui?” ganti Tulamak batakun.
“Urusan nginuman wan wadainya kusarahakan wan Garbus lalu ikam pambantunya Mak-ai,” ujar Palui. “Kaya apa kalo wadainya hintalu karuang haja,” ujar palui pulang.
Isuknya bubuhan tamu datangan, baistriahat dan sambahyang Asyar, lalu Palui mangiyau Garbus wan Tulamak.
“Bubuhan sidin sudah sambahyang dan surung haja nginumannya,” ujar Palui manyuruh Garbus. Lalu kaluar Garbus wan Tulamak mambawa nginuman banyu setrup langsung mahidangakan.
“Kaluarakan jua wadainya,” ujar Palui manyuruh.
“Silakan nginum dan inilah wadai alam nang disadiakan,” ujar Garbus.
“Ikam mambawa napa Bus?” ujar Palui hiran malihat Garbus mambuka bungkusan.
“Aku manyadiakan hintalu, ada hintalu hayam dan ada jua hintalu itik,” ujar Garbus sambil mambuka bungkusannya.
“Ikam pang Mak mambawa napa pina manyurung kurungan,” ujar Palui makin hiran.
“Aku mambawa babarapa ikung burung,” ujar Tulamak malihatakan kurungannya.
“Astagfirulah, bubuhan ikam ini manyupanakan aku banar. Kanapa maka mambawa hintalu wan burung karuang itu?” ujar Palui sarik.
“Kami manyadiakan sasuai suruhan sampiyan, samalam sampiyan mamasan supaya disadiakan hintalu karuang, maka inilah hintalunya…. dan inilah burung karuangnya…,” ujar Garbus wan Tulamak manunjuk.
“Salahku jua, salahku jua….. sudah tahu haja bubuhan ikam kada cukup hitungan tapi kusuruh jua,” ujar Palui manyalahakan kakawalannya mahindari supan wan tamu-tamunya. (BANJARMASINPOST.CO.ID – repro)
Sumber: Banjarmasin Post Edisi Cetak, tanggal 1 Agustus 2019
Palui mempersiapkan kunjungan pejabat ke kampungnya dan meminta Garbus serta Tulamak menyiapkan minuman dan kue sederhana karena acara hanya sebentar. Namun karena salah paham, Garbus membawa telur ayam dan itik,…
