Kesah Palui : Umpan Hayam

Suatu pagi, Palui bertemu Garbus yang sedang membawa ayam ke pasar untuk dijual karena harga pakan naik. Palui menasihati agar tidak ke pasar karena takut ditangkap polisi, tapi Garbus menjelaskan ayamnya betina, bukan ayam aduan. Tulamak datang dan ikut berpendapat, sementara Garbus mengeluh tentang mahalnya biaya pakan. Palui sombong berkata ia punya ayam yang tidak perlu diberi makan mahal karena cukup diberi “kertas”. Garbus dan Tulamak tidak percaya, lalu ikut Palui ke rumahnya. Ternyata “ayam” yang dimaksud Palui hanyalah ayam tanah liat yang disimpan di lemari. Garbus pun menertawakannya, sementara Palui tetap bangga karena menganggap ayam tanahnya bisa membawanya naik haji.

*****

BAISUKAN tadi wayah tulak maujek, Palui batamuan wan Garbus nang lagi mambawa hayam tuju ka pasar. Garbus tapaksa manjual hayamnya, lantaran haraga saraba naikan.

“Handak kamana Bus pina bajintingan hayam?” ujar Palui manakuni Garbus.

“Aku handak ka pasar,” sahut Garbus.

“Kalu handak basaung hayam jangan ka pasar Bus ai, kaina ditangkap pulisi,” ujar Palui.

“Cuba itihi Lui, hayam nang kubawa ini adalah hayam bini kada hayam laki, kada biasanya urang basaung hayam bini,” ujar Garbus.

“Sabarataan hayam bini kawa haja disaung, tapi basaungnya wan ampunnya saurang,” ujar Tulamak nang hanyar cungul.

“Kami kada bakisah carobo Mak ai, tapi kisah ini nah kawal kita si Garbus handak bajual hayam,” ujar Palui.

“Aku tapaksa bajual hayam ini karna kada kawa lagi mambarimakani, umpannya larang banar,” ujar Garbus pina marista.

“Kalu handak baharaguan hayam jangan tanggung-tanggung saikung atawa sapuluh ikung karna maurusnya sama haja wan baharaguan saratus ikung,” ujar Tulamak.

“Ikam maklum haja Mak ai, wayahini saraba larang maka tapaksa aku bajual hayam haraguan,” ujar Garbus.

“Aku ada jua baisian hayam Bus ai, sudah batahun-tahun tapi kada ngalih mambarimakani biarpun haraga bama makanannya sampai sapuluh kali larangnya, tatap haja kuharagu,” ujar Palui.

“Napa makanannya Lui?” ujar Tulamak.

“Makanannya nyaman banar, saban minggu atawa satangah bulan ayamku kubarimakani kartas,” ujar Palui pina baagak.

“Karampuuttt… Palui pangaramput, di dunia ini kadada hayam nang makanannya kartas,” ujar Garbus manumpalak.

“Mana buktinya Lui bahwa hayam ikam makanannya kartas atawa aluminium,” ujar Tulamak handak tahu. “Ayu kita ka rumahku,

lihati hayamku itu lamak banar karna dibarimakani kartas tarus,” ujar Palui malihatakan hayamnya wayah bubuhannya bailang ka rumah Palui.

“Panderan ikam itu mahaluya tarus Lui ai, bujur haja hayam ikam ini dibarimakani kartas karna awaknya tanah liat dan guringnya di dalam lamari,” ujar Garbus manumpalak Palui karna hayam nang diharagunya itu adalah hayam tanah gasan tabungan duit.

“Dengan hayamku ini, aku barancana handak naik haji,” ujar Palui takurihing kahimungan. (tam/rep)

Sumber: Banjarmasin Post Edisi Cetak, tanggal 21 Oktober 2019

Suatu pagi, Palui bertemu Garbus yang sedang membawa ayam ke pasar untuk dijual karena harga pakan naik. Palui menasihati agar tidak ke pasar karena takut ditangkap polisi, tapi Garbus menjelaskan…