Kesah Palui : Mata Duitan

Garbus sering gagal dalam urusan asmara meski sudah lama mencari jodoh. Ketika ditanya sebabnya, ia beralasan bahwa jodoh adalah rahasia Tuhan. Namun, Tuhirang mengingatkan bahwa lamaran terakhirnya gagal karena calon istrinya dianggap mata duitan. Garbus kecewa dan menyimpulkan semua perempuan sekarang hanya melihat uang. Palui menegur, menjelaskan bahwa bukan hanya perempuan, laki-laki pun bisa mata duitan. Untuk membuktikan, Palui melempar uang Rp20.000. Seketika Tulamak dan Tuhabuk berebut mengakuinya. Palui pun menegaskan, sifat tamak terhadap uang tidak mengenal jenis kelamin—semua bisa silau oleh harta.

*****

BIAR lawas bagandakan, balum tantu jua bajuduh. Buktinya Garbus, sampai wayahini kada sing kawinan. Makanya, kakawanannya hiran wan Garbus naini.

“Tiap handak babini, ikam ini pasti gagal Bus ai. Apa garang kahandak,” ujar Tuhirang hiran.

“Sabujurnya kada gagal Rang ai, tapi balum sampai wayahnya,” ujar Garbus.

“Pabila sampai wayahnya itu Bus?” ujar Tuhirang.

“Lahir, mati wan juduh itu kadada nang tahunya karna itu rahasia Tuhan,” ujar Garbus baulah alasan.

“Aku parcaya haja napa nang ikam ulah alasan itu, tapi kanapa samalam sudah pasti banar bagandak malah handak balalamaran wan si Janah, nyatanya pagat di tangah jalan,” ujar Tuhirang.

“Tapaksa kupagat karna pina batingkah, pina macam-macam kahandak tamasuk jimat Japang nang dikisahakan Palui samalam,” ujar Garbus.

“Bapadah ja bujuran Bus ai bahwa gandak ikam itu mata duitan,” ujar Tuhirang.

“Hi-ih Rang ai, samunyaan bibinian wayahini mata duitan, hijau mata malihat duit. Kita nang bajalan batis ini pasti kalah wan nang baisian sapida mutur,” ujar Garbus pina sarik gara-gara patah hati wan Janah.

“Napa nang ikam sambat itu Bus? Kudangar ikam baucap bahwa samunyaan bibinian wayahini mata duitan. Aku kabaratan Bus ai ucapan ikam itu karna masih banyak bibinian nang baik hati, sederhana, kada cariwit dan kada mata duitan,” ujar Palui nang hanyar datang umpat manyurung pander.

“Biar kada samunyaan bibinian mata duitan, tapi kabanyakan nyata dah!” ujar Garbus kada hakun kalah.

“Nang ngarannya mata duitan itu Bus ai, kada cuma bibinian haja tapi lalakian bisa jua mata duitan dan hijau mata, jadi sama haja lalakian atawa bibinian,” ujar Palui.

“Napa buktinya Lui?” ujar Tuhirang.

“Ikam handak buktikah? Itu nah lihati si Tulamak wan Tuhabuk ampah ka sini, kaina kuandaki lambaran duit Rp 20.000,” ujar Palui.

Imbah Tulamak wan Tuhabuk parak ka hadapan Palui wan Garbus, lalu Palui baucap nyaring: “Nah, nahhh … itu duit siapa?” ujar Palui manunjuk.

“Ini duitku, itu duitku …,” ujar Tulamak wan Tuhabuk taimbai barabut manjumput lambaran duit Rp 20.000 itu.

“Bujurankah duit ikam Mak, maka ikam hanyar haja liwat di sini,” ujar Palui.

“Aku kamarian samalam liwat di sini, rupanya duitku itu tagugur. Sudah pasti ini duitku karna aku ingat banar gambarnya adalah gambar kai tuha bakaca mata,” ujar Tulamak mangarasi.

“Nah Bus, inilah bukti bahwa lalakian mata duitan jua, hijau mata malihat duit,” ujar Palui mambari cuntuh dan buktinya sambil malipat duit dua puluhan ribu itu lalu mamasukakan ka dalam salipinya. (mht/rep)

Sumber: Banjarmasin Post Edisi Cetak, tanggal 25 Oktober 2019

Garbus sering gagal dalam urusan asmara meski sudah lama mencari jodoh. Ketika ditanya sebabnya, ia beralasan bahwa jodoh adalah rahasia Tuhan. Namun, Tuhirang mengingatkan bahwa lamaran terakhirnya gagal karena calon…