Kesah Palui : Wadai Hangat

Palui sekeluarga dikenal rajin mencari rezeki. Ia berjualan ikan sejak subuh, istrinya membuat wadai, dan anak-anaknya menjajakannya keliling kampung. Saat Garbus dan Tulamak memuji wadai buatan istri Palui, mereka memanggil anak Palui yang lewat menjual wadai hangat. Garbus heran kenapa wadai masih hangat padahal dijajakan sejak pagi. Anak Palui menjelaskan dengan percaya diri bahwa nyiru tempat wadainya dijamur sambil berjalan, jadi tetap hangat kecuali saat hujan. Garbus dan Tulamak tertawa, menyadari kepintaran anak Palui yang meniru kecerdikan ayahnya dalam berdagang.

*****

PALUI sakaluargaan dasar bujur cangkal bacari duit. Satiap subuh Palui tulak bacari iwak ka palabuhan atawa ka pasar subuh, imbah itu dijual ka pasar. Kalu bini Palui baulah wadai dan anak-anaknya lah nang manjajanya kuliling kampung. “Kalu bausaha itu Bus ai jangan supan-supan… nang panting hasilnya halal,” ujar Palui rancak mamadahi wan anak bininya.

“Lui.. ui Palui…, Ujar Garbus wadai bini ikam nyaman banar, handak pang aku umpat marasani,” ujar Tulamak.

“Hi-ih, pukuknya wadai ulahan biniku itu kadada duanya, nyaman banar, lamak-lamak manis,” ujar Palui mamuji wadai ulahan bininya. Kalu ikam handak marasani lajui basinggah ka warungku,” ujar Palui mambawai kakawalannya.

“Kada usah jauh-jauh Mak ai, itu nah anak Paluinya bajunjungan manjaja wadai. Kalu ikam handak marasani lakasi kiyau,” ujar Garbus manunjuk.

” Uiiii… anak Palui, bawa ka sini wadainya, aku handak manukar,” ujar Tulamak.

“Wadai napa haja nang dijaja?” ujar Garbus.

“Macam-macam pakacil ai, ada cucur, pais, gagatas dan ada jua pisang talas basanga. Samunyaan wadainya masih hangat-hangat, di hilir tadi banyak urang manukari,” ujar anak Palui.

“Mulai pukul barapa ikam bajualan, maka wadainya masih hangat,” ujar Tulamak.

“Ulun tulak matan rumah mulai baisukan sampai imbah zuhur kaina,” ujar anak Palui.

“Kalu tulak matan baisukan kada mungkin wadainya masih hangat, pasti sudah dingin,” ujar Garbus.

“Kalu sampiyan kada parcaya cuba ja japai, masih hangat kalu?” ujar anak Palui manyuruh.

“Kada mungkin wadai baisukan bisa hangat sampai siang,” ujar Garbus.

“Hi’ih-lah masih hangat, kaya apa caranya?” ujar Tulamak imbah manjapai.

“Ulun bajualan pakai nyiru kalu, tutup nyiru ulun lipat lalu ulun jamur sambil bajalan. Wadai ulun ini hanya bisa dingin bila hari hujan,” ujar anak Palui.

“Hahahaa… sakalinya nang anak kaya abahnya jua, sami mawon bisa ma-akal mangaramputi urang,” ujar Tulamak.

“Nang panting halal,” ujar Palui malawanakan anaknya. (ivd/mht)

Sumber: Banjarmasin Post, tanggal 31 Oktober 2019

Palui sekeluarga dikenal rajin mencari rezeki. Ia berjualan ikan sejak subuh, istrinya membuat wadai, dan anak-anaknya menjajakannya keliling kampung. Saat Garbus dan Tulamak memuji wadai buatan istri Palui, mereka memanggil…