Kesah Palui : Disuruh Manikin

Palui tampak sering melamun karena akan dinikahkan oleh orang tuanya. Teman-temannya seperti Garbus dan Tulamak menggoda, mengira Palui sedih karena takut kehilangan masa bujang. Setelah hari pernikahan tiba, Palui membaca taklik nikah dengan lancar karena sudah berlatih sebelumnya. Panghulu menasihati agar rumah tangganya rukun dan bahagia. Saat diminta menandatangani surat nikah, Palui malah salah paham, mengira “tikin” berarti “menikahi” di depan umum. Candaan itu membuat semua orang tertawa, apalagi setelah Palui menambah lelucon soal teman-temannya yang suka mengintip malam pertama.

*****

SAMINGGUAN ini Palui talihat pina banyak mangalamun. Imbah ditakuni sakalinya Palui rancak mangalamun itu karna inya handak dikawinakan ulih abah umanya.

“Mustinya kalu handak dikawinakan itu justru basukaria, karna cagar dapat bini. Lain kaya kami ini, kadada nang handak mangawinakannya karna kadada bibinian nang mau,” ujar Garbus.

“Karna napa Bus maka kadada nang handak mangawinakannya? Karna kada payu,” dijawab saurang ulih Tulamak.

“Kukira kada karna kada payu Mak ai tapi balum wayahnya,” ujar Palui umpat manjawabakan.

“Kanapa maka ikam bingung dan taungut Lui?” ujar Garbus.

“Aku sadih tapisah wan masa bujangku,” ujar Palui.

“Ayu bujang… bujang lapuk?” ujar Tulamak.

Ahirnya Palui nikah jua, disaksikan kakawalannya Tulamak, Garbus, Tuhirang, Tuhabuk dan warga RT-nya. Imbah tuntung manyambut akad nikah, lalu disuruh mambaca takliq nikah didampingi bininya. Lancar banar Palui manyahut dan mambaca teks takliq itu karna sudah baminggu-minggu dipalajarinya.

“Ikam harus kaya ini kaya itu, kada bulih kaya ini kaya itu, banyak nang harus dipatuhi dan banyak jua nang harus dijauhi supaya parkawinan ikam rukun, rakat dan bahagia,” ujar Panghulu dalam nasihat parkawinannya. “Sanggup kalu Lui?” ujar Pangulu.

“Insya Allah sanggup,” ujar Palui.

“Nah, kalu kaya itu lakasi tikin,” ujar Pangulu manyuruh.

“Tikin wayah inikah Pangulu?” ujar Palui sambil lihum manyirit bininya.

“Hi’ih, wayah ini jua supaya disaksikan urang banyak,” ujar Pangulu manyuruh.

“Kalu manikin di sini ulun supan Panghulu ai, malam kaina haja jangan di tangah urang banyak ini. Ulun bajanji malam kaina bahimat ulun manikin bini ulun ini, biar sampai takuriak kada ulun lapas. Ulun supan kalihatan Garbus wan Tulamak,” ujar Palui.

“Ikam ini dasar pambabal Lui ai, nang ditikin itu adalah surat nikah ikam. Kalu sual tikin manikin di kalambu malam kaina urusan ikam badua. Tapi hati-hati jua karna kudangar Garbus wan Tulamak sudah baulah luang handak maintip ikam,” ujar Panghulu manggayai Palui.

“Kalu malam kaina Garbus wan Tulamak maintip malah aku suka supaya kacar liurnya malihat guyang biniku nang kaya ngebor si Inul,” ujar Palui tatawa ma-agaki bubuhannya. (ivd/mht)

Sumber: Banjarmasin Post Edisi Cetak, tanggal 6 November 2019

Palui tampak sering melamun karena akan dinikahkan oleh orang tuanya. Teman-temannya seperti Garbus dan Tulamak menggoda, mengira Palui sedih karena takut kehilangan masa bujang. Setelah hari pernikahan tiba, Palui membaca…