Kesah Palui : Gara-gara Banang Habang
- 39 kali
Palui ditunjuk sebagai wakil ketua RT untuk mengurus kuperasi kampung. Ia memimpin rapat warga mendengar penjelasan petugas PPL tentang kuperasi, yang merupakan wadah ekonomi rakyat untuk menukar barang dengan harga murah, menabung, dan berhutang secara kolektif. Garbus menasihati Palui agar memahami “banang merah”, inti masalah yang dijelaskan pembicara. Palui kemudian mengambil bungkusan yang dimaksud dan membawanya ke Garbus, menunjukkan bahwa ia mengerti inti persoalan. Meski menjadi ketua kuperasi, Palui tetap mengatur semua keputusan dari bawah kendalinya sendiri, menegaskan peran strategisnya dalam pengelolaan kuperasi dan hubungan dengan warga.
*****
Kampung Palui baluman ada baisian kuperasi. Makanya wayah ada suruhan matan pambakal supaya tiap RT baulah kuperasi, maka Paluilah nang ditunjuk gasan maurusinya.
Tapaksa Palui maundangi warganya gasan rapat bakumpul mandangarakan panjalasan matan patugas PPL kuperasi sakaligus pambantukan kuperasinya.
“Aku Bus ai bujur haja katua tapi kada pintar bapander apalagi mamimpin rapat, makanya ikam haja nang manggantiakan aku,” ujar Palui bapadah ka-anu Garbus.
“Ikam ini Lui ai talalu banar wan kawan, bila nang nyamannya digawi saurang, tapi bila ngalih lalu dijulung wan aku,” sahut Garbus.
“Wajar haja karna ikam kutunjuk sabagai wakil katua. Wakil katua tugasnya mambantu katua jadi mawakili aku,” ujar Palui.
“Aku sanggup haja mawakili katua tapi kita bajanji bila ada labihannya dibagi dua,” ujar Garbus sambil bagaya.
Kada lawas rapatnya dimulai. Palui nang cagar jadi katuanya hinip haja di higa Garbus. “Rapat pambantukan kuperasi dibuka dan acara salanjutnya kita dangarakan panjalasan ulih bubuhan kantur kuperasi,” ujar Garbus.
“Sudara-sudara sakalian, kuperasi adalah wadah gasan kita manukar barang kaparluan hidup nang haraganya murah, makanya samuanyaan warga harus jadi anggutanya, harus mambayar iuran dan manukari barang nang dijual kuperasi, bisa bahutang dan bisa jua manabung,” ujar PPL kuperasi. “Kuperasi ini adalah usaha ekunomi rakyat, usaha sabarataan dan kalu dicari-cari banang merahnya, sasuai wan anjuran UUD kita,” ujar patugas kuperasi bacaramah.
“Nah Lui, dangarakan napa ujar si pancaramah, parlu dicari banang merahnya,” bisik Garbus.
“Banang merah itu napa Bus?” ujar Palui.
“Banang merah itu adalah banang habang,” ujar Garbus.
“Ayu ja Bus ai aku paham, tapaksa aku nang mancariakan karna aku nang cagar jadi katuanya,” sahut Palui, lalu langsung bukah ka warung. Kada lawas Palui masuk pulang ka ruang rapat, sambil bagamat Palui manjulung bungkusan ka-anu Garbus.
“Bungkusan napa ini Lui?” ujar Garbus babisik.
“Itu tadi nang dicari si pancaramah, yaitu banang merah alias banang habang nang dimintanya,” ujar Palui.
“Wah……. sakalinya ikam kada paham napa nang dimaksud banang merah tadi, ujar Garbus maniwas Palui. Banang merah itu kada lain adalah parsualan utamanya nang ada kaitannya antara nang sabuting wan nang lainnya,” ujar Garbus.
“Kalu kaya itu tapintar ikam dan tapaham ikam pada aku Bus ai, ujar Palui, makanya aku mangalah dan ihlas haja ikam jadi katua kuperasinya tapi tatap di bawah parintahku karna akulah katua RT-nya,” ujar Palui manyuruh Garbus. (mht/rep)
Sumber: Banjarmasin Post, tanggal 26 Juli 2020
Palui ditunjuk sebagai wakil ketua RT untuk mengurus kuperasi kampung. Ia memimpin rapat warga mendengar penjelasan petugas PPL tentang kuperasi, yang merupakan wadah ekonomi rakyat untuk menukar barang dengan harga…
