Kesah Palui : Atas Maatasi

Palui menjelaskan rahasia keharmonisan rumah tangganya dengan Zaleha, yang dijaga sejak sebelum menikah. Kunci utamanya adalah patuh dan sepakat antara suami istri, termasuk dalam urusan dapur dan urusan keluarga lainnya. Palui menekankan pentingnya komunikasi dan pengertian, serta menyesuaikan perlakuan sesuai kondisi, misalnya piring mangkuk yang berbeda bunyinya saat dipakai. Rahasia ini hanya diketahui pasangan agar tetap harmonis. Saat menghadapi masalah, prinsip “bagagantian di atas” diterapkan sebagai solusi, meski kadang menimbulkan konsekuensi tak terduga. Dengan cara ini, Palui dan Zaleha bisa menjaga ketenangan dan keharmonisan rumah tangga.

*****

Kakawalan Palui panasaran banar, bubuhannya handak tahu rumusnya maka salawas Palui balaki babini wan Zaleha sama sakali kada biasa tadangar bahualan laki bini.

“Itulah barakat manuruti kahandak nang tuha, tarima haja apa ujar sidin jangan dilawan. Walaupun sabalum kawin kami kada bapapatuhan tapi nyatanya cucuk haja sampai wayah ini baranak anam ikung,” sahut Palui.

“Kami maklum haja ujar ikam itu Lui ai, tapi ujar urang bahari jua bahwa saapik-apiknya manata piring pasti cagar tadangar jua bunyi hantuknya,” ujar Garbus.

“Bujur jua papadah urang bahari itu tapi lihati dahulu piringnya apakah piring mangkuk papaci atau piring mangkuk pelastik. Karna bila piring mangkuk pelastik, biar kaya apapun tahangkupnya pasti kada kadangaran bunyinya,” ujar Palui badalih.

“Ikam dasar maakal banar Lui ai, kalu kaya itu jawabannya ba-arti kaluarga ikam rancak jua bahualan tapi kada tahabar kaluar,” ujar Tulamak.

“Itu tamasuk rahasia dapur wan rahasia kalambu kada bulih urang lain nang tahunya, makanya harus bujur-bujur harus sapakat wan bini artinya sanggup batapung tali salawar biar bungkas dilandau kada cagar maungkai,” ujar Palui.

“Kalu kaya itu kami kalah wan alasan-alasan ikam karna ikam pisit banar maingkuti rahasia kaluarga,” ujar Garbus.

“Maklumlah inya tamasuk pangikut ajaran bahari, sakali kawin gasan saumur hidup,” ujar Tulamak.

“Kalu urusan kaluarga Bus ai, kukira dimana-mana atawa siapa haja pasti ada masaalahnya hanya tagantung kita nang manyandangnya. Jadi aku sama sakali kadada bailmu apa-apa, sama baliur kaya bubuhan ikam jua,” ujar Palui.

“Tapi kaya apa caranya ikam ma-atasi bila wayah bahual,” ujar Garbus batakun handak tahu resepnya.

“Sual atas-maatasi laki bini gawian gampang walaupun akibatnya ganal,” ujar Palui sambil lihum.

“Atas mangatasi kaya apa,” Lui ujar Tulamak.

“Ya, atas ma-atasi artinya bagagantian diatas,” sahut Palui.

“Akibatnya nang ganal itu pang kaya apa Lui?” ujar Garbus.

“Naahhh…..bagagantian di atas itulah nang ganal akibatnya bila kita batahan satumat,” ujar Palui.

“Apa akibatnya ? ujar Garbus makin handak tahu.

“Akibatnya mancangul pulang saikung bisa sigaluh atawa si nanang,” ujar Palui mangalak tatawa mangalahakan kakawalannya. (rep/tam)

Sumber: Banjarmasin Post Edisi Cetak, tanggal 15 September 2020

Palui menjelaskan rahasia keharmonisan rumah tangganya dengan Zaleha, yang dijaga sejak sebelum menikah. Kunci utamanya adalah patuh dan sepakat antara suami istri, termasuk dalam urusan dapur dan urusan keluarga lainnya.…