Kesah Palui: Sasapu Wan Ember

HARI Ahad samalam di kampung Palui diadaakan kerja bakti babarsih-barsih. Samunyaan disuruh hadir mambawa sasapu bilah hidi wan ember gasan mambarasihii halaman kalurahan.
“Samalam wayah karja bakti, Palui maakal,” ujar Tulamak.
“Maakal kaya apa Mak?” lanjut Garbus handak umpat mangalahakan Palui.
“Ikam padahakan maakal kaya apa Mak? Samunyaan nang disuruh kugawi, kada maakal,” balas Palui.
“Samalam itu kita karja bakti di kalurahan, pambakal manyuruh membawa sasapu bilah hidi dan membawa ember gasan mambarasihii halaman, tapi ikam malalain,” ujar Tulamak.
“Malalain kaya apa Mak?” ujar Garbus.
“Wayah itu Palui justru membawa sasapu haduk dan membawa gagayung, jadi malalain pada urang lain,” ujar Tulamak.
“Aku bujur haja manurut napa nang disuruh pambakal, tapi sabalumnya kukaji kemaatafannya supaya jangan mubazir. Bubuhan ikam bagawi babarasih halaman wan sasapu hidi dan mancibuk banyu wan ember, maka akulah nang malangkapinya,” ujar Palui baulah alasan.
“Malangkapi kaya pa Lui?” ujar Garbus.
“Kalu samunyaan mambarasihi halaman lalu siapa nang mambarasihi ruangan, makanya aku manyapu ratik di ruangan wan sapu ijuk. Kalu bubuhan ikam mambarasihi pagar, palatar sakulahan wan banyu seemberan maka banyaklah banyu tabuang, mubazir lalu kuinjami gagayung halus supaya banyu kawa dihimmat dan kada haran,” ujar Palui masih mangasak jawaban.
“Hi’ih, bujur jua alasan Palui itu Mak ai,” ujar Garbus.
“Gawiannya maakal tarus, mambunguli kawan. Kalu kakawalan bagawi mancangkul dan basasapu di halaman baleheran paluh karna bapanas maka Palui sambil banyanyi-nyanyi lenggang-lenggok basasapu di naungan,” ujar Tulamak pina manggairgit kasasarian wan Palui. emhati (repro)

Kesah ini diambil dari Banjarmasin Post, Edisi Minggu 02 November 2025.

HARI Ahad samalam di kampung Palui diadaakan kerja bakti babarsih-barsih. Samunyaan disuruh hadir mambawa sasapu bilah hidi wan ember gasan mambarasihii halaman kalurahan. “Samalam wayah karja bakti, Palui maakal,” ujar…