Kesah Palui : Tiga Ribu Salitar

Palui bercerita ia beli bensin murah Rp3.000, membuat Tulamak dan Garbus penasaran lalu ikut beli ke kios. Ternyata harga Rp3.000 itu hanya untuk setengah liter karena Palui tak punya uang, bukan harga per liter. Mereka merasa tertipu, sementara Palui menegaskan dia tak pernah bilang itu harga per liter — hanya bilang “murah.”

*****

PAHARATAN mahadangi panumpang, buhan Palui pasti katuju bahual muntung. Amun kada kaya itu, kada rami bubuhan paojekan.

“Untung banar wayahini minyak murah, jadi kada talalu mamikir minyak mun maojek,” ujar Tulamak gagarunum.

“Ikam bapander minyak murah, barapa garang manukar di eceran?” ujar Palui manakuni.

“Macam-macam Lui ai, ada nang Rp5.500, ada jua nang bajual Rp6.000, kanapa gerang?” ujar Tulamak.

“Aku kada suah manukar di eceran, rancak manukar di pom bensin.”

“Tapi kulihat ikam samalam manukar minyak di wadah julak ijul?” ujar Garbus manakuni.

“Aku rahatan kada baduit, untung haja sidin manjuali aku murah,” ujar Palui

“Murah napanya Lui? Kulihat sidin manjual sama ja lawan nang lain,”

ujar Tulamak mangaras.

“Sidin manjuali aku Rp 3.000 haja,” ujar Palui.

“Karamput, pangaramput banar, mana ada urang bajual eceran murah pada di pom? Tulamak kada pacaya.

“Amun ikam kada pacaya, cubai nukar,” ujar Palui.

Marasa kada pacaya sakaligus handak mambuktiakan panderan Palui, buhannya Tulakan manuju kios julak Ijul.

“Bujurkah pian manjuali Palui samalam minyak Rp.2500 lak?” ujar Tulamak batakun.

“Bujur ai, kanapa garang? Buhan ikam handak manukar jua kah?” ujar sidin.

“Amun kaya itu isiakan ampun ulun hibak-hibak,” ujar Tulamak langsung manyurung kasapida muturnya.

“Ulun jua lak ai, isi hibak jua,” ujar Garbus umpat-umpatan.

“Barapa lak barataan? ujar Tulamak wan Garbus batakun.

“Ampun Tulamak Rp 20,000, ampun Garbus Rp.15.000 ujar julak mamadahi.

“Hau, kanapa lak? Tangki ulun ni isinya paling ampat litar, kanapa jadi Rp.24.000? Amun haraganya Rp.3000 x 4 litar paling duabelas ribu ja,” ujar Tulamak takakajut.

“Kanapa jadi sama haja harganya lawan nang lain lak? Maka ujar Palui pian bajual RP3.000? ujar Garbus jua umpat takajut.

“Aku manjuali Palui Rp3.000 tu satangah litar karna inya kada baduit, kadanya salitar pang,” ujar julak mamadahi.

“Amun kaya itu Lui sama ai di lain jua, ikam ini pangaramput haja,” ujar Tulamak wan Garbus manyanyarik lawan Palui.

“Buhan ikam nang capat managuk panderanku, adakah aku mamadahi haraga saitu tu salitar? Aku cuma bapadah murah karena aku kada baduit,” ujar Palui lucut manawaakan buhannya nang tapakalah. (bpost/rep)

Sumber: Banjarmasin Post Edisi Cetak, tanggal 21 Desember 2019

Palui bercerita ia beli bensin murah Rp3.000, membuat Tulamak dan Garbus penasaran lalu ikut beli ke kios. Ternyata harga Rp3.000 itu hanya untuk setengah liter karena Palui tak punya uang,…