Kesah Palui : Minyak Urut
- 38 kali
Menjelang musim tanam, Palui dan kawan-kawan lelah bekerja di ladang. Palui ingin dipijat dan menyuruh Garbus mencari minyak urut. Garbus malah mengambil minyak obat nyamuk semprot dari gardu. Saat dipijat, Palui merasa baunya menyengat. Tulamak tertawa karena Garbus ternyata mengambil minyak nyamuk. Palui tetap santai dan bilang setidaknya tubuhnya sehat dan tidak akan digigit nyamuk seminggu.
*****
WAYAH parak musim batanam, Palui wan kakawalannya bilang hari-hari bagawi di pahumaan. Bilang kadada istirahatnya.
“Mustinya awak ikam itu bakurus Mak ai, karna bagawi di pahumaan ini sama wan baulahraga,” ujar Palui.
“Kada kawa latik-latik Lui ai, awakku barat,” ujar Tulamak.
“Biar kaya apa haja Tulamak bagawi kada mungkin awaknya bakurus Lui ai karna makin inya bahimat bagawi malah makin kuat makannya,” ujar Garbus umpat manyahut.
“Kalu aku Bus ai, bila uyuh bagawi itu makannya kada sabarapa tapi nginumnya nang banyak,” ujar Palui.
“Tulamak ini kada kawa dituduhi Lui ai, biar haja parutnya bungkas kakanyangan,” ujar Garbus maniwas.
“Napa haja nang kugawi, samunyaan itu aku jua nang manyandangnya,” ujar Tulamak kada hakun dituduhi.
“Bus tulung Bus cariakan paurutan, awakku rasa kipa dan rasa ringkut banar,” ujar Palui minta tulung wan Garbus.
“Hakunlah ikam kucariakan paurutan picak, inya pintar banar maurut,” ujar Garbus sambil manunjuk ‘itu nah paurutannya’.
“Ayu lakasi kiyauakan, aku handak baurut wayah ini jua,” ujar Palui manyuruh.
“Ikam baurut juakah Mak?” ujar Garbus.
“Biar haja nang kurus-kurus baurut supaya sihat karna inya panggaringan, awakku sigar haja,” ujar Tulamak manunjuk Palui.
“Adalah minyaknya gasan maurut,” ujar tukang urut itu.
“Hadangi satumat Lui ai, kucariakan minyaknya di gardu,” ujar Garbus bukah ka gardu. Lalu imbah maambil, langsung mambawa minyaknya di dalam balik susu.
“Ayu lakasi barabah batilungkup Lui, minyaknya sudah ada,” ujar tukang urut manyuruh Palui barabah.
“Wah nyaman banar urutannya, minyaknya babau malingut banar,” ujar Palui babarapa kali wahin.
“Minyak patin buatan jawa,” ujar Garbus lihum.
“Napa merek minyaknya maka rasa manyalingit banar ka hidung,” ujar Palui manakuni tukang urut.
“Aku kada malihat mereknya Lui ai, tapi minyaknya kada licin, kasat,” ujar tukang urut.
“Bus, uiii… Bus, napa merek minyak gasan baurut ini nang ikam ambi di gardu tadi?” ujar Palui manakuni Garbus.
“Haha hahaaa… ikam Lui ai dibunguli Garbus, minyak nang dijulung Garbus itu adalah minyak ubat nyamuk semprot nang ada di gardu,” ujar Tulamak mangalakak tatawa sambil mambaca tulisan di butul semprotan itu.
“Ayu ja tarus haja urut, biar minyak ubat nyamuk semprot, awak sihat dan tahan samingguan kada diigut nyamuk,” ujar Palui kada hakun kalah digawi Garbus wan Tulamak. (mht/rep)
Sumber: Banjarmasin Post Edisi Cetak, tanggal 27 Desember 2019
Menjelang musim tanam, Palui dan kawan-kawan lelah bekerja di ladang. Palui ingin dipijat dan menyuruh Garbus mencari minyak urut. Garbus malah mengambil minyak obat nyamuk semprot dari gardu. Saat dipijat,…
