Kesah Palui : Kadundung Diparut

Palui sakit cikungunya dan disarankan Tulamak mengobati dengan buah kadundung parut. Sayangnya, istrinya salah paham: bukannya memarut, ia malah meletakkan satu kampil (sekampung besar) kadundung utuh di perut Palui semalaman. Akibatnya Palui makin kesakitan, seolah ditindih benda berat. Saat Garbus dan Tulamak datang, mereka tertawa melihat kesalahan itu. Istri Palui pun malu dan minta maaf karena salah mengartikan saran Tulamak.

*****

TALU hari ini pus runda di kampung sunyi. Maraganya, Palui nang katuju maramiakan lagi garing. Garbus wan Tulamak gin pina mengaulir ka pus runda rahat Palui garing.

Imbah isya, buhan Garbus wan Tulamak tulakan manjanguki Palui. Nang ngaran kawan sarantang-saruntung, kada nyaman jua malihatakan kawan garing. Manjanguki barang, biar kada babawa makanan.

“Napa nang ikam harit lui?” ujar Garbus pas malihat Palui pina mambari maras. Kada sing garakan di pangguringan.

Nang ditakuni kada kawa manyahuti. Bini Palui banar ai nang manyahutiakan. “Ujar mantri inya kana cikungunya. Kada kawa bagarak lalu. Rasa sakit saawakan jar,” ucap bini Palui sambil maulahakan kupi gasan buhannya.

“Bah.. ini sutil banar ubatnya. Amun cikungunya tu ubatnya kadundung diparut haja. makin banyak makin bagus,” sahut Tulamak pina musti.

Imbah bubuhannya bulikan, Palui manyuruh bininya maminta buah kadundung ka wadah kamanakannya di dukuh. “Sabanyak-banyaknya umanya ai. Sakampil kah,” ujar Palui.

Malam isuknya, rahat Garbus wan Tulamak dudukan di warung acil Isul, bakakajutan cangul bini Palui sambil manyarik-nyarik. “Kaya apa ikam itu Mak, lakiku kadanya wigas, tapi malah babangat imbah diubati wan kadundung saran ikam itu. Tuh inya kasakitan banar di rumah. Ini aku handak mangiyau mantri maubatiakan,” ujar bini Palui pina mahahing.

Mandangar babangat, mahancap buhannya bukahan ka rumah Palui. Sampai di rumah, dasar bujur si Palui malah pina babangat, kada kawa bagarak, bahinak gin ngalih. Tagal, imbah manjanaki bujur-bujur. Garbus wan Tulamak malah tatawa mangalangkang.

“Kaya apa kada babangat. Kadundung sakampilan langkap wan kampil-kampilnya diandak di parut Palui. Ada ai kalu parak sapuluh kilu baratnya. ha ha ha..,” Garbus wan Tulamak tatawaan mangalangkang.

“Urang wigas gin garing amun ditindihi kadundung sakampil di parut. Apalagi nang garing,” ujar Garbus manambahi.

“Maksudku itu kadundung diparut wan parudan imbah itu hanyar parutan kadudndungnya dikasaiakan ka wadah nang sakit itu tadi,” ujar Tulamak manjalasakan.

Palui kada sing bunyian, matanya manyirit ka bininya nang pina karinyum-karinyum saurangan marasa basalah. “Ampun maap abahnya ai. Tulamak samalam kada langkap mamadahi. Ulun kira diandak diparut haja makanya sakampilan ulun andak. Sakalinya diparut wan parudan,” ujar bini Palui sambil manahani tatawa.

“Jaka kada garing tahu am biniku ngini,” ujar Palui gagarunum dalam hati sambil manyimbah kampil kadundung nang parak saharian manindih parutnya. (bpost/ofy)

Sumber: Banjarmasin Post Edisi Cetak, tanggal 2 Januari 2020

Palui sakit cikungunya dan disarankan Tulamak mengobati dengan buah kadundung parut. Sayangnya, istrinya salah paham: bukannya memarut, ia malah meletakkan satu kampil (sekampung besar) kadundung utuh di perut Palui semalaman.…