Kesah Palui : Tarajia Papadaan

Istri Palui yang baru belajar mengendarai motor dihentikan polisi saat razia karena tidak membawa surat-surat kendaraan. Ia tidak tahu arti “razia” dan mengira itu bisa “dibayar.” Setelah dijelaskan polisi bahwa razia adalah pemeriksaan surat kendaraan, barulah ia paham. Ketika polisi tahu pengendara itu adalah istri Palui, ia kaget karena ternyata “babini anum” (istri muda) Palui sendiri, membuat situasi jadi lucu.

*****

LAWAS bininya batangsa sapeda motor, imbah satahun hanyar kawa Palui manukarakan. Itu gin amun kada mainjam duit matan kuitannya gasan uang muka, kada harapan Palui kawa mangariditakan sapeda motor tu.

Imbah ditukarakan itu, bininya balajar basapeda motor nang kaya urang jua. Kalanyar kalunyur kasana kamari. Biar kada pati parlu gin tulak jua basapida motor. Sadidikit basapeda motor, sadidikit basapeda motor. Salingkangan dua lingkangan gin basapeda motor jua.

Hari itu bininya si Palui basapeda motor pulang. Pas dikiau polisi. Jauh-jauh polisi sudah maniup piluit sambil ma-ngawai.

Handak nangapa polisi ni sing kawai-kawai ujar bininya si Palui dalam hati. Singgahai inya. Masih batunggang di sapeda motornya, masin gin kada dimatikannya.

Kanapa? Handak umpat kamana? ujar bininya Palui.

Minta surat-suratnya! ujar polisi.

Surat-surat nangapa?

Parhuning lawan ribuis!

Kada baisi nang itu ai.

Tuh? Andak kasana sapeda motornya.

Ai, kada handak manitipakan di sana! Aku handak kapasar!

Ini rajia!

Kalu macam itu batakun ai!

Boleh haja!

Barpa garang harganya rajia itu?!

Heh! Manghina polisikah? Polisi handak sarik.

Kahada, aku ini batakun babujuran, barapa garang harganya rajia itu?!

Malihat bininya si Palui pina sarius, polisi tu tadi hanyar paham nang urang ngini dasar kada tahu arti rajia.

Kami ini ditugaskan komandan mamariksai kandaraan nang lalu disini. Siapa nang langkap surat-suratnya kami suruh lalu haja. Tapi amun kada langkap, kami tahan. Ini rajia ngarannya.

Kada kawakah rajia itu diganti haja lawan duit?

Kadada istilah ngitu!

Ayu ai mun kaya itu! Tapaksa ai bininya si Palui bulik bajalan.

Eh, hadang dahulu! Siapa ngaran nang ampun sapeda motor ini!

Lakiku!

Ngarannya?!

Si Palui!

Polisi tadi takajut mandangar. Inya kada tahu nang mambawa sapeda motor itu bininya si Palui.

Bah! Babini anum pulanglah si Palui ujar polisi tu nang kada lain pada Surawin. Tarajia papadaan am sakali ini. (bpost)

Sumber: Banjarmasin Post Edisi Cetak, tanggal 12 Januari 2020

Istri Palui yang baru belajar mengendarai motor dihentikan polisi saat razia karena tidak membawa surat-surat kendaraan. Ia tidak tahu arti “razia” dan mengira itu bisa “dibayar.” Setelah dijelaskan polisi bahwa…