Kesah Palui : Saling Manulung

Tulamak yang sudah berusia lebih dari tiga puluh tahun belum juga menikah, berbeda dengan teman-temannya seperti Palui dan Garbus yang sudah berkeluarga. Dalam percakapan santai, mereka membahas perbedaan antara hidup sendiri dan hidup berumah tangga. Garbus berpendapat bahwa menikah membawa kenyamanan dan kebahagiaan karena memiliki pasangan dan anak, meskipun ada tanggung jawab dan kesulitan yang harus dihadapi. Palui menimpali dengan gaya bercandanya bahwa dalam rumah tangga harus ada kerja sama antara suami dan istri, bahkan ia berseloroh bahwa ia mencuci celananya sendiri agar adil dalam berbagi tugas.

*****

SAMPAI umur labih maniga puluh, Tulamak balum jua hidup bakawan alias babini. Padahal kakawalannya nangkaya si Palui wan Garbus balalajuan babanyakan anak. Bahkan si Tuhirang sudah mahanyari pulang alias babini anum.

“Mana nyamannya hidup saurangan wan hidup badua Mak?” ujar Garbus manyirit Tulamak.

“Aku hiran banar Bus ai wan tatakunan ikam itu, mustinya ikam jawab saurang karna aku baluan marasai hidup bakawan,” sahut Tulamak marasa.

“Jawabanku jelas haja sama nyamannya dan sama sakitnya,” ujar Garbus.

“Kalu sama nyamannya dan sama sakitnya itu adalah jawaban maantara artinya kadada pandirian,” ujar Tulamak.

“Kukira jawaban nang bujur adalah nyaman hidup bakawan jua. Artinya kita kada manyasal kawin dan kada manyasal babini,” ujar Garbus mambujurakan jawabannya. “Karna baisian bini itu nyaman sagala-galanya,” ujar Garbus.

“Balum tantu, balum tantu nyaman sagala-galanya,” ujar Palui bakakajutan umpat manyahut.

“Napa kada nyamannya Lui?” ujar Tulamak.

“Banyak risiko dari gawian nyaman itu. Manyadiakan tapih, baju bini, makan nginum, baromantisan, batianan, baranakan, mangganalakan lalu manyakulahakan,” ujar Palui manyambati sakitnya.

“Nang ikam sambati itu kada ba-arti sakit, karna ada jua nyaman dan sanangnya. Baranakan itu adalah anugerah Tuhan, betapa bahagianya baisian anak. Cuba ikam bandingkan wan urang nang puluhan tahun kawin tapi balum baranakan jua, sadih, sadiihhh…,” ujar Garbus.

“Hi’ih-lah bujur jua ujar ikam itu Bus ai,” ujar Palui.

“Makanya tadi jawabanku bahwa risiko kawin itu antara sakit wan sanangnya imbang haja,” ujar Garbus mambuliki panderannya.

“Kaya itulah kawin, makanya jangan dianggap beban, Jangan takutan kawin Mak ai,” ujar Palui.

“Ikam sudah puluh tahun kawin Lui ai tapi kanapa maka sampai wayah ini kulihat ikam batatapas salawar saurang? Kanapa maka kada bini nang manapasakan?” ujar Tulamak.

“Itulah arti kerja sama, saling mambantu saling manulung. Aku kasihan wan biniku apabla inya manapas nang kandal-kandal nangkaya salawarku ini. Makanya aku hakun haja maurus dan manapas salawarku tapi biniku dapat bagian maurus sebaik-baiknya nang ada di dalam salawarku. Ya kalu… ya kalu?” ujar Palui mangalakak tatawa.

“Panderan Palui ini putingnya pasti ka nang sabuting itu” ujar Tulamak manumpalak. (mht/rep)

Sumber: Banjarmasin Post Edisi Cetak, tanggal 1 Februari 2020

Tulamak yang sudah berusia lebih dari tiga puluh tahun belum juga menikah, berbeda dengan teman-temannya seperti Palui dan Garbus yang sudah berkeluarga. Dalam percakapan santai, mereka membahas perbedaan antara hidup…