Kesah Palui : Anak Partama
- 35 kali
Kepanikan dan tergesa-gesa sering membuat seseorang kehilangan fokus hingga melakukan kesalahan yang sebenarnya bisa dihindari. Dalam menghadapi situasi genting, penting untuk tetap tenang, berpikir jernih, dan memastikan segala sesuatu telah dipersiapkan dengan baik. Selain itu, kerja sama serta dukungan dari orang sekitar sangat dibutuhkan agar setiap masalah dapat diselesaikan dengan lebih cepat dan aman.
*****
Palui himung banar karna satumat lagi inya cagar manjadi abah. Ujar dukter tinggal mahadang harinya haja, bininya cagar maranakakan anaknya nang partama.
“Abahnya! abahnya…,” ujar bini Palui kukuciak.
“Kanapa ding maka kukuciakan kaya urang kabakaran janggut haja? ujar Palui manyasah.
“Ini nah parut ulun rasa handak maladum, rasa kada kuat manahan lagi abahnya ai. Makin barancak mahuatnya, lakasi kiau bidan,” ujar bini Palui takuringis.
“Hadangi dulu umanya, labih baik kita ka rumah sakit haja. Karna ujar dukter labih aman baranak di rumah sakit apalagi ini anak kita nang partama,” ujar Palui.
“Tasarah pian haja, nang panting lakasi, ulun sudah kada tahan lagi,” ujar bininya.
“Aku basasiap tas nang handak dibawa dulu, lalu imbah itu manyiapakankan sapida mutur. Ikam bararabah haja dulu satumat,” ujar Palui abut saurangan.
Imbah tuntung basasiap tas, mambuati baju wan tapih bininya, Palui lalu kaluar mahidupi sapida mutur lalu langsung badadas tulak. Saparapat jam di jalan akhirnya sampai jua inya di rumah sakit. Palui langsung bukah manakuni wan bubuhan parawat wadah urang nang handak malahirakan.
“Ui ading parawat dimana wadahnya husus gasan urang baranak?” ujar Palui pina hingal-hingal.
“Itu nah, pian babiluk ka kiwa, lalu biluk lagi ka kanan, imbah itu lurus haja sampai ada palang nang batulisan ruang bersalin,” ujar parawatnya manarangakan.
Palui bukah pulang manuju nang dipadahakan parawat tadi. Imbah tatamu palang nang batulisan ruang bersalin inya masuk ka dalam. Di dalam kabalujuran ada dukter nang lagi batugas.
“Dukter! dukter!” ujar Palui kukuciak. “Tulungi ulun dukter,” ujarnya manggah.
“Sabar… sabar, cuba pian kisahakan dulu napa masalahnya,’ ujar dukter.
“Itu nah, bini ulun handak baranak. Ujarnya sakit banar sudah pina handak tabarujul,” ujar Palui manarangakan.
“Barapa kali dalam samanit ujar bini ikam sakitnya?” ujar dukter manakuni.
“Kada tahu jua, tapi ujarnya makin barancak huatannya,” ujar Palui pulang.
“Mananya bini ikamnya? Lajui suruh masuk, kita pariksa dulu pambukaannya,” ujar dukter.
“Astaghfirullah!” ujar Palui bakakajutan batapak kapala.
“Kanapa?” ujar dukter manakuni.
“Ulun kada ingat mambawa bini ulun dukter ai. Tadi ulun suruh inya barabah pahadangan ulun basasiap,” ujar Palui langsung bulik maambili bininya.
Imbah sampai di rumah sakalinya bubuhan urang kampung sudah bagarumbungan di palataran rumahnya. Sakalinya bininya sudah baranak, anaknya lalakian. Untung ada bininya Garbus nang kabalujuran liwat manulungi mangiyauakan bidan. (rep/ivd)
Sumber: Banjarmasin Post Edisi Cetak, tanggal 11 Februari 2020
Kepanikan dan tergesa-gesa sering membuat seseorang kehilangan fokus hingga melakukan kesalahan yang sebenarnya bisa dihindari. Dalam menghadapi situasi genting, penting untuk tetap tenang, berpikir jernih, dan memastikan segala sesuatu telah…
