Kesah Palui : Tatak Talu
- 37 kali
Palui bersama Garbus dan Tulamak yang pergi ke pasar hanya untuk melihat keramaian dan hiburan. Setelah menonton pertunjukan sulap dan musik jalanan, mereka membeli sepotong roti besar untuk dimakan bersama. Palui dipercaya membagi roti menjadi tiga bagian secara adil, namun sebelum membaginya ia membuat kesepakatan bahwa jika ada sisa potongan, maka sisanya menjadi miliknya. Dengan cerdik, Palui membagi roti menjadi tiga bagian dan menyisakan sedikit untuk dirinya. Ketika protes, Garbus dan Tulamak tidak bisa membantah karena sudah menyetujui kesepakatan. Kisah ini menunjukkan kelicikan dan kecerdikan Palui dalam memanfaatkan situasi.
*****
HARI Ahad samalam bubuhan Palui wan kakawalannya tulakan ka Banjar, handak bajalanan ka pasar. Sabujurnya kadada mancari napa-napa hanya handak malihat urang bajualan. Jualan nang paling rami dilihatnya adalah urang bajual ubat, karna pasti ada hiburannya lagu-lagu dangdut, katangkasan basapida ban satu atawa main sulap.
“Aku tahu haja dikaramputinya main sulap itu, tapi hati sanang,” ujar Garbus.
“Untung kita karna manuntun main sulap atawa mandangarakan lagu-lagu itu kada bayar,” ujar Tulamak sambil pina baguyang-guyang batisnya.
“Kalu aku tapaksa manukari ubatnya sabungkus sebagai pangganti uyuhnya nang bajual ubat itu mancari duit,” sahut Palui.
“Ehem, ehemmm … aku paham kanapa maka Palui manukari ubat itu, karna tadi dipadahakannya bahwa ubat itu kawa mawarasi gatal-gatal wan sangkadi,” ujar Garbus manyindir.
Wayah kalaparan bubuhannya manukar salunjur ruti manis. Karna rutinya ganal maka bubuhannya manukar sabigi haja. Rancananya kaina dibagi talu.
“Kami sarahakan wan ikam haja Lui ai mambaginya,” ujar Garbus manjulung rutinya.
“Kalu bubuhan ikam mamparcayakan wan aku, maka supaya adil ruti ini kita tatak talu karna kita batiga.
Tapi sabalumnya kita bajanji bila tiga tatakan itu kada sama atawa labih sadikit atawa ada labihannya imbah dibagi tiga itu maka labihan itu adalah haknya nang manatak artinya manjadi hakku.
Karna itu manjadi hakku maka bubuhan ikam kada bulih manggugat,” ujar Palui.
“Aku wan Tulamak satuju dan ihlas haja, tapi nang jelas tatakannya harus tiga tatakan,” ujar Garbus maakuri.
“Ayu injam ladingnya Bus, saksikan aku manatak rutinya gasan kita bagi batiga,” ujar Palui sambil pina maukur-ukur mulai manatak rutinya.
Tatakan partama gasan Tulamak, ayu sambut Mak ini rutinya gasan ikam. Tatakan kadua bagian tangah ini gasan Garbus, ini nah Bus sambut ruti bagian ikam. Dan nang ta-ahir tatakan katiga gasan aku,” ujar Palui langsung manyuap kamuntung.
“Barapa kali ikam manatak Lui? Kanapa maka masih ada labihannya sapanggal?” ujar Garbus manunjuk.
“Ikam tadi sudah malihat dan manyaksiakan saurang bahwa aku manatak tiga tatakan, satu … dua … tiga … dan sasuai janji kita bila ada labihannya adalah hak nang manatak artinya manjadi hakku,” ujar Palui badadas manjumput langsung manyulum kamuntungnya.
“Dibungulinya pulang…,” ujar Tulamak wan Garbus gagarunum karna kakalahan. (mht/rep)
Sumber: Banjarmasin Post Edisi Cetak, tanggal 13 Februari 2020
Palui bersama Garbus dan Tulamak yang pergi ke pasar hanya untuk melihat keramaian dan hiburan. Setelah menonton pertunjukan sulap dan musik jalanan, mereka membeli sepotong roti besar untuk dimakan bersama.…
