Kesah Palui : Dikarukut Bini
Palui yang mengikuti upgrading jauh dari rumah dan mulai merasakan kerinduan berat terhadap istrinya setelah berminggu-minggu berpisah. Ia merasa gelisah, tidak tenang, bahkan pikirannya terganggu hingga akhirnya meminta istrinya datang. Sang istri pun datang dengan penuh perjuangan, namun terjadi salah paham ketika teman-teman Palui membuat lelucon seolah ia memiliki wanita lain. Saat Palui masuk kamar, ternyata “wanita” itu adalah istrinya sendiri yang langsung marah besar. Cerita ini menekankan pentingnya kesetiaan, kejujuran, dan keharmonisan dalam hubungan suami istri meski berjauhan.
*****
KALU maninggalkan padaringan, maninggalakan umanya, amun sampai saminggu haja, ya kukurang labih haja pang.
Tapi amun labih pada saminggu apalagi sampai maniga bulan, itu nang darah putih naik ka kapala. Nang asalnya tikus lalu bisa jadi kucing, nang asalnya kucing lalu bisa jadi macan atawa singa. Liur lalu baubah nang asalnya kada baik lalu palihat jadi langkar.
Rupanya parasaan lawan pengalaman si Palui nang umpat upgrading sama kaya urang jua. Pamulaan waktu dikesahakan urang, kada parcaya pang inya.
“Cah, dasar dilaluakan!” ujar Palui.
“Hi-ih, kaena muha ikam, amun marasa maka tahu!” ujar Surawin.
Damini hanyar si Palui mambujurakan. Waktu saminggu maumpati upgrading, kada apa-apa, biasa haja. Jalan dua minggu, apa lagi masuk ka minggu katiga si Palui hampir kada kawa umpat maikuti palajaran lagi.
Bulu awak sacagat-cagat haja, kapala sasakit-sakit, panjanak bakunang-kunang. Kalau malihat kaum hawa lalu kada cukup sakali manjalaki, tapi dua tiga kali. Hakun haja tapapalengor gulu.
“Amun kaya ini, bisa barusakan. Hati rusak, upgrading rusak!” ujar si Palui
Basusunyian si Palui bakirim surat ka rumah. Isinya kada lain pada menyuruh bininya datang. Kaya apa-kaya apa haja, disuruhnya bininya datang sahari dua hari. Amun kada kawa bamalam, bulik ari barang. Kalu kada bisa gawat, ujar si Palui dalam suratnya.
Limbah mambaca surat tu, bini si Palui paham ai. Tapi kada gampang kaya ka Gambut tu haja pang tulaknya. Ini malanggar laut. Amun bakapal banyu, lambat pulang. Tapi amun ba-plane, duitnya pulang kaya apa. Tapi bini si Palui ingat lawan Tulamak. Dadatanginya Tulamak handak bainjam duit.
Esoknya tulak ai bini si Palui bakapal tarbang. Sampai di kota wadah si Palui upgrading, tarus ai menyewa taksi. Kada ngalih pang manuju sabab ada tulisan di mukanya nang mamadahakan di situ wadah upgrading.
Waktu bininya sampai, si Palui kadada. Nang ada kakawanannya nang lain haja. Limbah bubuhannya tahu nang bibini tu si Palui, disuruh ai ka kamar si Palui. Bini si Palui barabah di dalam kamar, bahadap ka tawing waktu si Palui datang.
“Kami ada membawa bibinian!” ujar kakawalannya.
“Iakah?” ujar si Palui.
“Bujur! Kami sudah sabaratan! Nang kaya ini!” ujar kawal tu maacungkan jempolnya.
Mancikuk si Palui mandangari, kadangaran ka dalam kamarnya oleh bininya. Mangarekot gigi bininya mandangar.
“Kanapa kada ditinggali aku!” ujar si Palui.
“Beres, kami kada handak makan saurangan pang, inya sudah kami suruh mahadang di kamar ikam jua!”
Mandangar kaya itu, bagemet si Palui masuk ka dalam kamar. Dibukanya lawang bagemet supaya kada babunyi, lalu manjinguk sadikit ka dalam. Dilihatnya dasar banaran, sudah barabah di kaguringannya hadap ka tawing. Bagemet ai inya masuk. Limbah mangunci lawang mamacul ka sapatu, mamacul pakaian luar lalu barabah di higa bibinian tu, sambil bagemet mangguncang awaknya.
“Ding, ding…. bapaling pang,” ujar Palui.
Bininya pupura kada mandangar. Diguncangnya lagi. Kada heran-heran jua.
“Guringkah ding……, kauyuhankah lagi,” Palui mambisiki.
Mandangar ujar Palui kaya itu, kada sabar lagi bininya. Inya bapaling, lalu marungkau si Palui, mangarukut muhanya sambil bakuciak:
“Kurang ajar! Bangsaaaaaat! Lahung laki……! Kaya itu haja rupanya gawian di sini!
Si Palui takajut banar. Kada dikira pang nang bininya saurang ada di dalam kamar.
“Kada lain pang, ini gawian kakawalan! ujar si Palui sambil bukah kaluar kamar. Muhanya habang bagurai-gurai. (hya/rep)
Sumber: Banjarmasin Post Edisi Cetak, tanggal 18 Februari 2020
Palui yang mengikuti upgrading jauh dari rumah dan mulai merasakan kerinduan berat terhadap istrinya setelah berminggu-minggu berpisah. Ia merasa gelisah, tidak tenang, bahkan pikirannya terganggu hingga akhirnya meminta istrinya datang.…
