Kesah Palui : Tapakai Salawar Anak
- 41 kali
Gotong royong menjadi ajang kebersamaan warga kampung ketika Tulamak dipercaya menjadi kepala kegiatan. Ia dengan antusias memimpin pekerjaan, sedangkan Garbus mengurus konsumsi dan Palui ikut membantu. Walau sempat diragukan karena dikenal suka beralasan, Palui justru datang dan bekerja sungguh-sungguh. Saat pembagian tugas, suasana menjadi lucu karena saling ejek di antara mereka. Tulamak menyebut Palui dan Garbus seperti anak sekolah karena celananya mirip seragam, namun Palui menanggapinya dengan candaan bahwa celananya bisa dipinjam anaknya, sedangkan Tulamak tidak bisa karena bentuk tubuhnya besar. Kisah ini menyoroti semangat kerja sama disertai keakraban dan humor warga.
*****
TULAMAK himung banar karna wayah bubuhan kampung maadaakan kagiatan gutung ruyung, inya ditunjuk sabagai pimpronya alias kapala gawi. Garbus kana bagian komsumsinya sadang paralatan nangkaya parang, cangkul, linggis dibawa masing-masing matan rumah.
“Dengan diparcaya jadi kapala gawi itu maka baarti ikam kada kawa baindah, harus hadir, harus umpatan bagawi Mak ai. Karena biasanya ikamlah nang paling pangulir,” ujar Garbus.
“Kukira tabanyak Palui nang kada umpat bagawi, karna bila hujan gerimis sadikit haja inya musti kada datang, bisa bapadah sakit gigi atawa batis bangkak atawa bisa jua baalasan salismaan atawa bapadah hatap rumah miris, bapadah bini sakit parut, saribu alasan,” ujar Tulamak cacarancang manyalahakan Palui.
“Kalu kalakuan Palui kada baik jangan dituruti,” ujar Garbus.
“Bus, Mak… aku datang, aku siap bagawi,” ujar Palui cangul bakakajutan.
“Syukur ikam datang Lui ai, sudah mulai tadi kami hadangi karna ikamlah nang paling tahu bagian mana nang paling didahulukan dicangkul dan ditabuk,” ujar Tulamak pina kasisipuan karna hanyar haja mahujat Palui. Untung Palui kada mandangar.
“Kawan-kawan sabarataan siapakan cangkul, parang, cakrup, linggis, tajak, kita mulai bagawi,” ujar Tulamak.
Lalu masing-masing basiap, ada nang mamacul baju tinggal kaus kaliwang, ada nang malipat salawar dan ada jua nang mamacul tapih, tamasuk Garbus wan Palui.
“Samunyaan babaris gasan kita mambagi regu supaya kada tagalumuk. Nang tuha-tuha subalah kanan, nang anum manggawi selokan dan anak sakulahan manabas rumput,” ujar Tulamak, si kapala gawi.
“Kami nang tuha-tuha minta gawian nang ringan haja,” ujar bubuhan julak Isul.
“Bubuhan kakanakan sakulahan nang ikam sambat itu mana urangnya Mak? Kita ini samunyaan warga RT, kadada kakanakan sakulahannya,” ujar Palui manyahut.
“Ikam Lui ai, Garbus wan anaknya julak Ambrun itu tamasuk kakanakan sakulahan,” sahut Tulamak.
“Sudah babulu tabal dan babinian ini maka dipadahakan kakanakan sakulahan,” sahut Garbus pina tasinggung.
“Ampun maaf Bus-lah, ampun maaf Lui-lah, ikam badua masih kuanggap kakanakan sakulahan karna Palui mamakai salawar biru tuha dan Garbus mamakai salawar warna habu ruku. Salawar warna biru tuha itu adalah seragam murid SMP dan warna habu ruku adalah salawar murid SMU,” ujar Tulamak lihum.
“Hi-ih lah, hari ini kita tapakalah wan Tulamak karna mamakai salawar seragam anak,” ujar Garbus mangaku kalah.
“Kita justru manang Bus ai, karna salawar kita sarasuk wan anak jadi kawa bainjaman dan bagagantian. Tapi Tulamak pasti kada kawa mainjam salawar anaknya karna buritnya ganal kaya bantal ditambah pulang burutnya kaya kastila,” ujar Palui mangalakak tatawa mangalahakan Tulamak.
(banjarmasinpost.co.id/rep/mht)
Sumber: Banjarmasin Post Edisi Cetak, tanggal 28 Februari 2020
Gotong royong menjadi ajang kebersamaan warga kampung ketika Tulamak dipercaya menjadi kepala kegiatan. Ia dengan antusias memimpin pekerjaan, sedangkan Garbus mengurus konsumsi dan Palui ikut membantu. Walau sempat diragukan karena…
