Kesah Palui : Manggambar Palangi

Palui mencoba mengajari anaknya pelajaran sekolah karena kecewa anaknya tidak bisa menjawab soal sejarah. Ia menanyakan tentang musim di Indonesia dan memberi petunjuk tentang hujan. Anak Palui dengan polos menjawab “musim kada hujan” untuk musim kemarau, membuat Palui mengelus kepala. Saat membahas pelangi, anaknya mengatakan bahwa yang melukis pelangi adalah “si Agung,” karena lirik lagu berbunyi “Pelukismu Agung.” Hal itu membuat Palui dan istrinya tertawa sekaligus jengkel. Istrinya pun meluruskan bahwa “Agung” bukan nama orang, melainkan menggambarkan keagungan Tuhan. Kisah ini menampilkan kepolosan anak dan kelucuan dalam keluarga Palui.

*****

RANAI Palui limbah tahu kajadian nang sabujurnya, bahwa nang anak dasar kada pintar manjawab soal sejarah samalam, nang mambunuh

Ken Arok adalah Anusapati.

“Ayu ja nak ai, mulai hari ini abah nang malajari ikam supaya kada mambari supan lagi,” ujar Palui wan anaknya.

Lalu ai Palui mangumpulakan buku-buku palajaran, mulai matan sajarah, palajaran bahitung sampai ka geografi wan fisika.

“Cuba ikam sambat ngaran-ngaran musim di Indonesia ini!” ujar Palui. “Tapi ingatakan jangan disambati musim buah-buahan atawa musim kaliyangan.”

“Kalu kada bulih manyambat musim buah wan musim kaliyangan, lalu musim napa pang lagi?” ujar nang anak manyarah.

Garu-garu kapala Palui malihat bahwa anaknya dasar kada pintar. Inya manyasal banar kanapa kada dari dahulu inya mahatiakan balajar anaknya itu.

“Kalu gugur banyu matan langit itu napa ngarannya nak?” ujar Palui mambari patunjuk.

“Itu ngarannya hujan bah ai,” ujar nang anak kahimungan kawa manjawab.

“Baarti kalu harinya hujan tatarusan artinya musim….?”

“Musim hujan!”

“Baarti kalu ada musim hujan maka ada musim…?”

“Musim kada hujan!” ujar nang anak.

“Ngarannya musim panas nak ai, ingatakan itu,” ujar Palui mamadahi.

“Kanapa bah bila limbah hujan lalu timbul palangi?” ujar nang anak tabalik batakun.

“Nangkaya itu pang sudah nak ai, sudah hukumnya. Manurut ikam pang kanapa?” ujar Palui.

“Palangi itu ada nang manggambarnya bah ai,” ujar anaknya.

“Siapa nang manggambarnya nak?” ujar Palui.

“Nang manggambar Palangi itu kada lain pada si Agung,” jawab nang anak.

“Kanapa jadi ikam manjawab si Agung nak? Ikam mambaca dimana?” ujar bini Palui nang kabujuran umpat mandangarakan.

“Cubai pian badua banyanyi lagu palangi tu..ada kalu ‘Merah, kuning, hijau di langit yang biru. Palukismu agung…’ Nah, bujur kalu palukisnya ngarannya Agung,” ujar nang anak.

“Bujur jua lah, sakalinya jawabannya kada ngalih karna ada lagunya,” ujar Palui unggut-unggut kapala.

“Dasar kada ubah bubuhan badua ni. Abah wan nang anak sama kada

tapi pintar,” ujar bini Palui pina sarik malihat kalakuan anaknya wan nang abah.

“Kanapa lagi kami disalahakan?” ujar Palui kada paham.

“Nang manggambar atawa malukis palangi tu lain agung,..agung tu gasan istilah maucapakan keagungan Tuhan… lain ngaran urang pintar ai,” ujar bini Palui garigitan. (banjarmasinpost.co.id/fai)

Sumber: Banjarmasin Post Edisi Cetak, tanggal 27 Maret 2020

Palui mencoba mengajari anaknya pelajaran sekolah karena kecewa anaknya tidak bisa menjawab soal sejarah. Ia menanyakan tentang musim di Indonesia dan memberi petunjuk tentang hujan. Anak Palui dengan polos menjawab…