Kesah Palui : Cabang Hanyar

Sejak jadi kepala gudang, Palui sibuk luar biasa. Ia jarang pulang, sering berangkat pagi dan baru kembali tengah malam. Awalnya istrinya maklum, tapi lama-lama muncul rasa curiga setelah mendengar gosip tak sedap. Palui terus meyakinkan bahwa ia sibuk karena membuka cabang baru di Tanjung. Namun, istrinya tetap gelisah, merasa Palui mulai jauh dari keluarga. Saat mereka berdebat, datang Garbus membawa pesan rahasia dari acil Irus yang merasa “samuak-muak”. Mendengar itu, Tulamak langsung paham — ternyata kesibukan Palui bukan hanya soal pekerjaan, melainkan “cabang anyar” lain di luar kantor.

*****

PALUI salawas diangkat jadi kapala gudang di parusahaan inya bagawi, handak kada tapi ada di rumah. Baisukan tulak, kaina tangah malamnya hanyar bulik ka rumah. Bisa jua takaisuk siangnya. Bilang handak nangkaya itu haja saban hari.

Mulanya bini Palui maklum haja wan gawian lakinya itu. Tapi lawas kalawasan inya pusang jua karna ada panderan-panderan urang nang kada nyaman didangar. Salain itu wayah ini Palui bilang kadada baisi waktu lagi gasan anak-bini.

“Dimaklumi hajalah umanya, tugas kantur,” ujar Palui mamanderi bininya.

“Balaki babini itu harus saling parcaya,” sahut bininya.

“Makanya ikam jangan parcaya kalu ada macam-macam sas-sus,” ujar Palui.

“Hi-ih, bahanu kada parcaya tapi bahanu rasa curiga jua,” ujar bininya.

“Makanya parcayalah wan muntungku, pasti kada diraguakan lagi,” ujar Palui babujur diri.

“Lalakian itu banyak akalnya,” ujar Tulamak umpat malawanakan bini Palui.

“Aku kada curiga kaka ai tapi bahanu hati bibinian ini bagaritik jua. Salawas baisian jabatan di kantur, sampiyan jarang bulik ka rumah. Kalaupun bulik, tangah malam hanyar datang,” ujar bini Palui pina mulai mambuka karaguannya.

“Wayah ini di kantur lagi sibuk-sibuknya umanya ai, karna kantur lagi mambuka cabang hanyar di Tanjung,” ujar Palui pulang.

“Cuba cuntuh aku Lui, tangah hari aku sudah ada di rumah. Karna gawianku nyaman banar, imbah maabsen baisukan, duduk satumat mambaca surat kabar sampai pukul satangah sapuluh amun kadada gawian aku bajalanan wan kakawalan ka pasar,” ujar Tulamak baagak.

“Baarti ikam tamasuk pagawai nang kada batanggungjawab, korupsi wan waktu wan mambari supan ngaran kantur karna basungsungan hari sudah kaluyuran,” ujar Palui.

“Mangabdi itu ada batasnya abahnya ai. Pabila kada babatas pasti cagar ada nang dirugiakan,” ujar bininya langsung bulik.

“Napa nang dipanderakan maka pina rami?” ujar Garbus nang hanyar datang.

“Kami mamander sual mangabdi wan gawian, karna bini Palui curiga wan lakinya salawas ini inya jarang guring di rumah. Alasannya babulan-bulan ini sibuk siang malam,” ujar Tulamak.

“Nah, pas banar. Aku ada kiriman pasan nang parlu disampaiakan wan Palui,” ujar Garbus babisik.

“Pasan siapa Bus?” ujar Palui manarik Garbus ka higa.

“Pasan matan acil Irus, bahwa sudah sabulan ini sidin samuak-muak tarus,” ujar Garbus.

“Hahahaaa… katahuan, katahuan. Tarnyata Palui dasar bujuran lagi sibuk mambuka cabang hanyar,” ujar Tulamak mahuhulut tapi kada wani maungkai rahasia lalakian itu wan bini Palui. (edisi cetak)

Sumber: Banjarmasin Post Edisi Cetak, tanggal 12 April 2020

Sejak jadi kepala gudang, Palui sibuk luar biasa. Ia jarang pulang, sering berangkat pagi dan baru kembali tengah malam. Awalnya istrinya maklum, tapi lama-lama muncul rasa curiga setelah mendengar gosip…