Kesah Palui : Canggih

Palui hidup sederhana bersama istrinya meski terlilit banyak hutang, namun tetap tampak tenang dan seolah tanpa beban. Saat ditagih oleh Garbus, ia hanya mampu membayar sebagian karena uangnya terbagi untuk berbagai hutang kecil lainnya. Tulamak menasihatinya agar hidup sesuai kemampuan, jangan lebih besar pasak daripada tiang. Meski begitu, Palui dikenal di kampungnya sebagai orang “harat dan canggih”. Dengan bangga ia mengaku bisa melakukan banyak pekerjaan, namun kebanggaannya segera dipatahkan Tulamak yang menertawakannya, mengatakan bahwa Palui bukan “canggih” karena keahlian, melainkan “canggih” karena Cangkal Bahutang Ngalih Ditagih, membuat semua tertawa geli.

*****

BIAR wayah ini panghidupan saraba sakit, tapi Palui tatap haja kalihatan pina nyaman. Panampilan nangkaya urang jua. Palui wan bininya sama aja, satali tiga uang. Nang panting kawa ba-agak, padahal duit bahutang tarus.

“Harap punahi hutang ikam karna ikam sudah babarapa kali bajanji balum jua mambayari,” ujar Garbus.

“Sabujurnya aku handak haja mambayari, tapi saparunya haja karna duitku kada cukup cuma Rp50.000 haja,” ujar Palui sambil manjulung salambar duit haraga Rp 50.000.

“Itu ada salambar lagi Rp 50.000 di kantung ikam,” ujar Garbus.

“Duit nang lima puluh ribu ini, aku gasan batahur hutang wan pakacil Isul Rp 20.000 wan julak Ambrun Rp 15.000 babayar kreditan panci Rp 10.000 wan Rp 5.000 gasan mambayari hutang di koperasi,” ujar Palui.

“Mustinya kalu bahutang itu diukur awak, dihitung pandapatan jangan sampai ganal pasak pada tihang,” ujar Tulamak umpat manumpalak Palui.

“Kudangar kawal kita si Palui ini hidupnya di rumah nyaman banar, minggu tadi kulihat manukar daging,” ujar Garbus.

“Kabalujuran haja ikam manamui biniku manukar daging, itu pun satangah ons haja dimakani sarumahan, sadang hari lainnya iwak karing wan tahu tempe tarus,” sahut Palui.

“Kudangar jua di kampung Palui takanal harat dan dapat galar Palui Canggih,” ujar Tulamak umpat manyala.

“Nah Lui, bujur kalu ikam tamasuk urang harat dan urang canggih,” ujar Garbus manambahi panderan Tulamak.

“Syukur, aku dipadahakan harat dan canggih karna dahulunya matan abah umaku bahkan matan mamarinaku sudah harat dan canggih,” ujar Palui ba-agak sambil bakacak pinggang.

“Harat dan canggih napa Lui?” ujar Garbus.

“Harat dan canggih bausaha, bisa manyupir, bisa jadi tangkulak, bisa maujek, biasa jadi pambantu camat, macam-macamlah,” sahut Palui makin ba-agak.

“Haha haaaaa… ikam jangan talalu ba-agak Lui ai,” ujar Tulamak manyahut.

“Kanapa kada bulih baagak Mak?” ujar Garbus.

“Aku tahu papatennya Palui, si Palui ini tamasuk canggih tapi canggihnya kada karna kaharatannya tapi canggihnya adalah Cangkal Bahutang Ngalih Ditagih,” ujar Tulamak mambuka rahasia.

“Aku manyarah, aku mangaku kalah,” ujar Palui pina lintuk kada kawa malawan lagi. (bpost/tam)

Sumber: Banjarmasin Post Edisi Cetak, tanggal 16 Mei 2020

Palui hidup sederhana bersama istrinya meski terlilit banyak hutang, namun tetap tampak tenang dan seolah tanpa beban. Saat ditagih oleh Garbus, ia hanya mampu membayar sebagian karena uangnya terbagi untuk…