Kesah Palui : Ada Jin (2)

Sepulang salat Isya di Masjid Nabawi, Palui dan istrinya berjalan santai menikmati suasana malam penuh pedagang Arab. Setelah membeli buah dan minuman, mereka kembali ke maktab dan menemukan kai pucat di dalam lift, ketakutan hebat. Kai mengaku melihat makhluk hitam besar bermata menyala yang disangkanya jin. Palui penasaran lalu mengajaknya kembali ke lantai enam. Saat pintu lift terbuka, “jin” yang dimaksud ternyata hanyalah petugas kebersihan asal Yaman berbadan besar dan berpakaian serba hitam. Kai pun malu sendiri karena ketakutannya ternyata hanyalah salah paham yang lucu dan memalukan.

*****

TUNTUNGAN sembahyangan Isa di Masjid Nabawi, bulikan ai si Palui laki-binian baimbaian lawan kai. Bajalan aja, santai, lantaran kada sampai setengah pal jauhnya. Kada karasaan pang bajalan, lantaran lampu listrik nang kaya siang tarangnya. Apalagi malihat urang Arab bajujualan macam-macam. Jamaah haji tumatan di mana-mana, bakarumbung malihat. Mana nang cocok liur, manukar, mana nang kada cocok haraga, kada jadi.

“Dua rial!Dua rial! Lima rial!” ujar padagang Arab itu manawarakan dagangannya. Maksudnya barang nang ditatingnya itu haraganya dua rial, dan lima rial.

Umumnya bubuhan Arab nitu tahu hitungan basa kita, dan kawa sabigi dua bigi manggunaakan basa kita waktu batatawaran. Jadi kada pati ngalih. Kalu kurang jelas, lalu manggunaakan basa isarat.

Sampai di maktab, si Palui laki binian kada badadasan naik.

“Pian badahulu kai ai,” ujar Palui sambil manyarahakan kunci kamar lawan kai.

“Kami handak basantai dahulu di bawah sini, sambil balilihat kalu ada nang ditukar. Wani aja kalu?” ujar Palui.

Kai tatawa mandangar. “Ikam anggap apa aku?” ujar sidin manyahuti, sambil bajalan manuju lift.

Palui tatawaan mandangar sahutan kai kaya itu. Palui lawan bininya sampat bajalanan malilihat urang bajualan di parak maktabnya tu tadi. Limbah itu bulik ai pulang inya ka maktab, mambawa sumangka lawan wadai dan minuman botol.

Sampai ka maktab, tarus ka muka lift, mahadangi ada urang turun tumatan di lantai anam. Waktu lift sudah tabuka, dan Palui lawan bininya handak masuk, nang kaya apa takajutnya inya malihat kai duduk tasandar di dinding lift, muha pucat, kada kawa basuara, dan mata kalihatan nang kaya urang katakutanan.

“Kanapa kai, kanapa?” ujar si Palui sambil mangguncang awak sidin. Lantaran kai kada sing bunyian, lalu Palui manarik sidin kaluar pada lift badua bininya.

“Semprotakan banyu kalu sidin takana strok!” ujar Palui manyuruh bininya. Bininya maambil semprotan nang kada sing pisahan pada awaknya, pabila dan kamana aja inya tulak.

Limbah disemproti lawan banyu ka muha, ka kapala, ka awak sidin, hanyar kai pina sigar jua, dan mulai kawa dipanderi.

“Kanapa pian kai, kapanasankah?” si Palui bagemetan batakun. Sidin manggelengakan kapala. “Pusingkah?” bini si Palui umpat jua batakun.

Kada jua, kai manyahuti babaya kadangaran.

“Lalu kanapa?” ujar Palui.

Kai lalu bagemetan bakesah. “Aku kahabisan takutan, lalu kada tahu apa-apa lagi. Waktu aku sudah sampai di tingkat anam, lift tabuka, kulihat ada makhluk nang kada suah kulihat.Ganal hirang, mata pina mancorong. Kada salah lagi, ini musti jin,” ujarku dalam hati.

“Lintuhutku mulai manggatar. Aku bapijim. Kucobaakan mambaca ayat-ayat, tamasuk ayat kursi. Waktu aku babuncalak, kulihat masih aja inya badiri di muka lift. Kubacaaakan pulang, lalu kutiupakan ka muhanya, tatap kada igul-igul.

Kulihat inya tatawa, giginya kalihatan pina ganal-ganal, panjang-panjang, putih-putih. Aku kada bapangrasa lagi. Banyak kunang-kunang kulihat. Mungkin limbah itu aku tarabah.Antara parcaya lawan kahada Palui mandangar kesah kai. Tapi inya tahu, kai urangnya bujur harus, kada bisa mananambahi atawa mangungurangi apa nang dilihat sidin.

Heran, ujar Palui dalam hati. Kalu inya jin atawa iblis, dibacaakan tutulak musti hilang. Jin apa nang kada ilui-ilui dibacaakan ayat kursi?

Limbah marasa yakin apa nang dilihat kai itu lain pada jin atawa iblis, lalu si Palui mambawai bininya lawan kai naikan ka tingkat anam.

“Kalu inya masih ada di sana,” ujar kai masih katakutanan.

“Kena ulun marimpungnya! ujar Palui pina musti.

Limbah sampai ka tingkat anam, lift tabuka. Babayanya malihat ka luar, kai manggatar, sambil mambisiki si Palui.

“Lihat, tuh, jinnya masih ada!”

Palui malihat nang ditunjukakan kai. Takurihing Palui malihat.

“Jin” itu tadi takurihing jua.

“Assalamualaikum!” ujar si Palui sambil mamaraki si “jin” dan mambarii apel dua buku.

Si”jin” manyambut buah apel sambil manyahut, “Alaikumsalaaam! Syukran, syukran!”

Nang dipadahakan jin oleh kai tu tadi, kada lain pada khadam alias pasuruh di maktab situ. Dasar pang, awaknya ganal, urangnya hirang, matanya pina lingas-lingas, giginya putih-putih, gamisnya hirang jua. Inya urang Yaman nang digajih manjaga maktab. Rupanya kai kada suah malihat inya. (HYA)

Sumber: Banjarmasin Post Edisi Cetak, tanggal 25 Agustus 2018

Sepulang salat Isya di Masjid Nabawi, Palui dan istrinya berjalan santai menikmati suasana malam penuh pedagang Arab. Setelah membeli buah dan minuman, mereka kembali ke maktab dan menemukan kai pucat…