Kesah Palui : Tupi Injaman

Dalam kegiatan Apel Siaga Siskamling di kampung Palui, terjadi kejadian lucu saat salah satu satpam yang bertugas menarik tali bendera mendadak sakit. Tugas itu akhirnya digantikan oleh Tuhalus yang memakai seragam pinjaman. Saat upacara dimulai, Tuhalus berusaha menirukan langkah satpam lain, namun gerakannya kacau dan membuat peserta menahan tawa. Ketika menarik tali bendera, topinya hampir jatuh karena terlalu longgar, membuatnya menunduk terus tanpa melihat bendera. Akibatnya, bendera naik terlalu cepat sampai ke pucuk sebelum lagu selesai. Meski memalukan, kejadian itu membuat apel menjadi kenangan lucu bagi warga.

*****

SAIRING awan rahatnya ‘tirur bum’ parigal bubuhan tiruris balakangan ini, maka dalam rangka maningkatkan kawasapadaan masyarakat tarhadap kaamanan lingkungan di sakitar tampat Palui bagana, ulih Pak Katua RW wan para tutuha masyarakat disapakati gasan maadaakan ‘Apil Siaga Siskamling’ nang diumpati ulih saganap warga masyarakat nang sudah diwasa lalakian-bibinian.

Untuk malaksanakan apil nitu ditunjuk Palui sapakawanan sabagai ‘Panpel’ atawa panitia palakasana dimana Palui sabagai katuanya. Palui lalu manyiapakan urang-urang nang cagar dijadiakan patugas upacara.

Palui jua sudah mahubungi pihak kalurahan gasan minta bantuan tiga urang tanaga satpam sabagai patugas ‘pangirik bandira’, sabab buhannya nitu sudah talatih sual baris-barbaris ( saikung tukang bawa bandira, saikung tukang tarik tali wan sikungnya lagi sabagai tukang ulur tali bandira ).

Dua hari sabalum hari ‘H’, ulih Palui dilakuakan galadi barsih (general repetisi atawa latihan langkap) sagan manyuksisakan upacara apil siaga tarsabut. Alhamdulillah samuanya lancar.

Tapi kamudian ‘apa handak dikata’, pas pada hari palaksanaan apil nitu tarnyata saikung satpam patugas pangirik bandiranya (nang batugas sabagai ‘tukang tarik tali’) mandadak garing sahingga kada kawa datang.

Bubuhannya sapakat barataan manunjuk kaalah Tuhalus. “Kadapapa Tuhalus-ai, tugas ikam sutil haja. Cuma manarik tali bandira tunggal dikitan sampai tanaik ka pucuk tihang,” ujar Tulamak mambujuki Tuhalus.

Tuhalus akhirnya tapaksa mahakuni. Tuhalus diinjamakan saragam satpam langkap awan tupinya.

Sabalum upacara Tuhalus sampat bagambar silfi babarapa pusisi. Tupinya pina lunglup. Maklum: tupi Injaman.

Pas waktu acara pangibaran bandira ‘mirah-putih’, patugas pangirik bandira pun ‘langkah tagap maju jalan’ manuju ka tihang bandira.
Tuhalus tapinghul-pinghul maumpati langkah tagap kadua satpam nang asli. Pasarta upacara kurihingan malihat batis kiwa awan tangan kiwa, batis kanan awan tangan kanan Tuhalus taimbai wayah malangkah wan malimbai.

Sasampai ka tihang bandira, bandiranya pun sagra diikat ka tali pangirik , ‘Lapurr ..! Bandira Siaappp !’. Imbah hitu kumandan upacara sagra bakuriak;‘Kapada Sang Mirah-Putih .. Hurmaaatt ..Grakkk.!!’

Tuhalus bagamat mulai manarik tali dangan iringan lagu ‘Indonesia Raya’, sambil matanya cangang maumpati jalan naiknya bandira.
Hanyar naik kira-kira saparapat tihang, tupi Tuhalus nang lunggar guang- gail handak tagugur ka balakang lantaran kapalanya tadungak .

Tuhalus ancap batunduk sambil tarus manarik tali. Pukuknya tarik tarus kada balilihatan ka bandira lagi, bila tali pina sandat (lantaran ditahani ulih kawan/tukang ulur, dihanggusnya. Akibatnya.., lagu hanyar jalan tiga parapat, bandira sudah badahulu sampai ka pucuk tihang.

Salasai upacara, Palui manumpalak kaalah Tuhalus. ‘Kanapa ikam manarik tali kada mancangangi bandira ..?!”

“Amun aku mancangangi bandira tatarusan, tupiku pacangan pacul pada kapala!” ujar Tuhalus kada hakun disalahakan.

‘Sampiyan ini jua kanapa tali diulur tarus kada ditatahani .?!” ujar Palui awan patugas tukang ulur tali.

“Saya sudah mancuba manahani, tapi dihanggusnya tarus ..!”.

‘Urang tu tahani bahimat kuat2 !” ujar Palui asa maggarigit.

‘Amun saya tahani kuat-kuat Pak Palui-ai, bisa-bisa saya nang tanaik ka pucuk tihang bandira ..!!?’. Palui hinip kada sing suaraan lagi.

(Ifan, sahibul hikayat matan rawasari )

Sumber: Banjarmasin Post Edisi Cetak, tanggal 25 September 2018

Dalam kegiatan Apel Siaga Siskamling di kampung Palui, terjadi kejadian lucu saat salah satu satpam yang bertugas menarik tali bendera mendadak sakit. Tugas itu akhirnya digantikan oleh Tuhalus yang memakai…