Kesah Palui : Ya Aluh ya Aluh

Setiap malam sebelum tidur, Palui dan istrinya selalu berbincang mesra, membahas pentingnya saling memahami agar rumah tangga tetap harmonis. Namun, percakapan berubah ketika istrinya menuduh Palui punya simpanan karena saat demam, Palui mengigau menyebut nama “Aluh.” Palui berusaha menenangkan dengan alasan bahwa yang dimaksud “Aluh” adalah istrinya sendiri, Aluh Zaleha. Meski Palui berkelit dengan manis, istrinya tetap curiga dan bersumpah akan mencari tahu siapa “Aluh” sebenarnya. Kisah ini berakhir lucu dan menggelitik, memperlihatkan gaya Palui yang lihai mengelak saat terpojok oleh istrinya.

*****

SATIAP handak guring malam Palui wan bininya pasti bapapandiran, bagagayaan sambil bagaritikan:

“Kita balaki-babini ini umanya-ai haruslah saling mamahami supaya tatap ruhui,” ujar Palui.

“Ulun abahnya ai sudah matan bagagandakan dahulu kaya itu, tapi abahnya haja nang pina rancak layau kada ingat anak bini di rumah,” sahut bininya.

“Kalu aku ada salah hilaf sadikit muhun dimaafakan haja umanya-ai, karna bahanu aku kada sadar lalu kalajuan,” ujar Palui.

“Makanya abahnya jangan sarik bila aku rancak managur,” ujar bininya.

“Tapi bila managur atawa manyuruh aku jangan di hadapan urang banyak kaya si Garbus atawa Tulamak Tuhirang, kaina aku dihuhulutnya bahwa aku diparintah bini,” ujar Palui. “Karna wayahini pinanya banyak bubuhan ibu-ibu pajabat nang harat pada abahnya, wani manyuruh karyawannya sakahandak hati, mamakai mutur dinas sakahandaknya,” ujar Palui mambari cuntuh.

“Kalu sampai tajadi kaya itu, kada ibunya nang harat tapi si lakinya si pajabatnya nang bungul kada kawa ma-atur bininya,” ujar bini Palui manjawab.

“Nah, jadinya ikam paham artinya kita kawa kada bahualan karna masing-masing sudah maklum tugas kawajibannya,” ujar Palui.

“Tapi ulun bulih haja kalu bila ada kada sapandapat wan sampiyan,” ujar bininya.

“Kita ini negara damokratis, bulih haja baunjuk rasa asal jangan sampai katahuan kakanakan. Siang baunjuk rasa tapi malamnya kita harus damai supaya jangan satris,” ujar Palui bagaya.

“Sampiyan abahnya ai kulihat pina ada jua bararahaisaan baisi simpanan,” ujar bini Palui maungkai kisah.

“Sumpah nah kadada baisian simpanan,” sahut Palui.

“Kanapa wayah garing samalam sampiyan pina basasambat macam-macam, tasambat jua ngaran bibinian,” ujar bininya.

“Wayah pabila?” ujar Palui.

“Wayah sampiyan garing panas samalam,” sahut nang bini.

“Biasa haja urang garing, apalagi garing panas bisa maigau karna kapanasan,” ujar Palui. “Wayah itu kaya apa igauku atawa amanganku?” ujar Palui handak tahu.

“Wayah sampiyan kapanasan itu kupupuk wan banyu es lalu ulun suruh baingat-ingat, ulun suruh bazikir ya Allah…… ya Allah….. mulanya sampiyan bujur haja manyahut ya Allah…… ya Allah tapi kalalawasan lalu baubah sambatan sampiyan jadi ya Aluh…..ya Aluh….. ya Aluh,” ujar bininya bakisah.

“Itu artinya kacicintaanku wan ikam ding-ai,” ujar Palui.

“Ayu padahakan Aluh siapa, Aluh siapa?” ujar bininya pina sangit.

“Aluh itu kada lain ikam jua si Aluh Zaleha,” ujar Palui sambil mamagut ka bininya.

“Biarpun sampiyan bapadah si Aluh itu adalah ulun, tapi tatap ulun cari siapa simpanan sampiyan itu,” ujar bininya maancam. emhati(repro)

Sumber: Banjarmasin Post Edisi Cetak, tabggal 15 November 2018

Setiap malam sebelum tidur, Palui dan istrinya selalu berbincang mesra, membahas pentingnya saling memahami agar rumah tangga tetap harmonis. Namun, percakapan berubah ketika istrinya menuduh Palui punya simpanan karena saat…