Kesah Palui : Gawian Malihat Hari

Palui selama sebulan jarang di rumah karena sibuk dengan pekerjaan barunya. Setiap pagi ia berangkat naik sepeda dan pulang menjelang sore. Ketika ditanya Tulamak dan Garbus tentang pekerjaannya, Palui awalnya enggan menjawab karena hasilnya belum seberapa. Ia lalu menjelaskan bahwa pekerjaannya disebut “malihat hari” atau “manyasahi pasar”. Artinya, Palui berjualan dengan berpindah-pindah sesuai nama hari pasar — dari Pasar Ahad hingga Pasar Sabtu — mengikuti jadwal buka tiap tempat. Setelah mendengar penjelasan itu, barulah Garbus dan Tulamak paham bahwa Palui sebenarnya bekerja sebagai pedagang keliling antar pasar.

*****

SUDAH sabulanan labih Palui jarang banar bagana di rumah. Mulai baisukan inya sudah tulak basapida sampai parak ashar inya hanyar bulik ka rumah. Isuknya nangkaya itu pulang. Pukuknya bila handak batamuan wan Palui amun kada kamariannya atawa malam harinya haja.

“Kudangar ikam sudah babulan-bulan ini manggawi gawian hanyar, bujur kah Lui?” ujar Tulamak batakun wan Palui.

“Hi-ih aku dangar nangkaya itu jua. Sabulan ini ikam jarang ada di rumah,” ujar Gabus.

“Aku supan bapadah Mak ai, karna hasilnya balum mambadai,” ujar Palui.

“Gawian napa nang ikam gawi Lui, pina bahalat hari ikam tulak basapida hibak wan bawaan,” ujar Tulamak.

“Sabujurnya gawianku adalah malihat hari,” ujar Palui.

“Kaya apa gawian malihat hari itu? Apakah ikam jadi nujum maramal hari, tanggal atawa maramal hujan?” ujar Garbus.

“Palui ini macam-macam haja baulah idabul, aku hanyar mandangar ada gawian nang bangaran malihat hari,” ujar Tulamak.

“Sabujurnya gawianku adalah manyasahi pasar,” ujar Palui.

“Makin bingung kami Lui ai, kada sampai utak kami mamikirakan wan istilah ikam gawian manyasahi pasar,” ujar Garbus mahuhulut.

“Gawian manyasahi pasar sudah ada mulai zaman nini datuk kita bahari, jadi kada ku ulah-ulah Bus ai,” ujar Palui.

“Kukira kadada pasar nang bukah, pasar itu tatap haja makanya kada parlu disasahi,” ujar Tulamak.

“Bujur Mak ai, pasar kada bukah tapi urang nang manukari wan nang manjuali nang bukah-bukah,” ujar Palui.

“Napa cuntuhnya Lui?” ujar Garbus.

“Manyasahi pasar itu artinya saban hari aku bajualan bapindah-pindah pasar. Umpamanya hari Ahad aku ka Pasar Ahad, hari Sanayan aku ka Pasar Sanayan, hari Arba aku tulak ka Pasar Arba, hari Kamis aku bagagas ka Pasar Kamis, isuknya ka Pasar Jumahat, ka pasar Sabtu sampai tabulik pulang ka pasar hari Ahad,” ujar Palui manjalasakan.

“Oooo… itukah nang ikam maksud gawian malihat hari alia gawian manyasah pasar,” ujar Garbus wan Tulamak hanyar paham gawian hanyar kawalnya itu. (ivd/mht)

Sumber: Banjarmasin Post Edisi Cetak, tanggal 6 Januari 2019

Palui selama sebulan jarang di rumah karena sibuk dengan pekerjaan barunya. Setiap pagi ia berangkat naik sepeda dan pulang menjelang sore. Ketika ditanya Tulamak dan Garbus tentang pekerjaannya, Palui awalnya…