Kesah Palui : Urang Pintar

Garbus merasa putus asa karena istrinya lama sakit dan tidak sembuh meski sudah berobat ke berbagai orang pintar serta mencoba banyak ramuan tradisional seperti akar tarap, daun belimbing, dan buah jaring. Segala usaha dilakukan, bahkan sampai ke pelosok, namun hasilnya nihil. Ia kemudian meminta bantuan Palui untuk mencarikan tabib lain. Palui membawa kemenakannya, Karim, yang kini menjadi mantri. Setelah diperiksa, istri Garbus mulai membaik. Garbus heran karena penyembuhnya ternyata anak muda yang dulu kurus dan biasa saja. Palui bangga karena kemenakannya terbukti pintar dan bermanfaat bagi orang lain.

*****

SUDAH baminggu-minggu ini Garbus ngalu kapala mamikirakan bininya nang garing, sudah dibarimakani macam-macam lungsur balum waras jua. Sudah jua inya bacari urang nang pintar, nang kawa batatamba tapi tatap bininya itu kada sing warasan. Parnah jua inya sampai kapalosok hutan gunung Maratus sana.

“Kalu handak batatamba kada usah sajauh itu, disini banyak haja nang bisa,” ujar Palui.

“Sudah jua kudatangi pananambaan julak Ambrun, kayi Dadap wan Uwa Iduk nang tamasuk urang pintar di wadah kita ini. Macam-macam dibari sidin ramuan tapi balum waras jua,” ujar Garbus.

“Ramuan lungsur kaya apa,” ujar Palui.

“Macam-macamlah, ada akar tarap, daun balimbing, humbut hanau dan ada jua buah jaring. Samunyaan sudah dicuba ada nang dijarang ada jua nang dirandam tapi balum waras jua. Apalagi buah jaring itu imbah dijarang dipadahakan sidin harus dimakan sarumahan supaya tahindar wan iblis-iblis nang bakaliaran disakaliling rumah kita,” ujar Garbus.

“Lalu kaya apa hasilnya imbah mamakan jaring itu,” ujar Palui batakun.

“Hasilnya siang malam kami tumbur sarumahan karna kantut babau jaring,” ujar Garbus.

“Mungkin balum juduhnya nang mawarasi,” ujar Palui.

“Tulung Lui cariakan pananambaannya, mungkin ada kakawalan ikam nang tahu urang pintar itu,” ujar Garbus minta tulung.

“Kita batatawakalan haja, mudahan ada ubat atawa pananambaan nang cucuk mawarasi,” ujar Palui.

“Aku basarah wan ikam haja Lui ai karna aku rasa buntu banar pikiran bila bini garing karna kada kawa diapa-apa,” ujar Garbus lihum.

“Kaina kamarian kubawaakan pananambaannya, mudahan inya kawa manulung bini ikam,” ujar Palui.

Wayah kamariannaya Palui datang wan pananambaan itu, imbah mamariksa bininya, lalu Garbus baucap :
“Anum banar umurnya dan baju salawarnya barasih banar pananambaan nang ikam bawa itu, biasanya urang pintar itu pina angker mambari takutan, basisingut bajanggut. Sidin itu pananambaan mana Lui,” ujar Garbus.

“Inya itu kamanakanku si Karim nang dahulu pina kurus karing bahingusan,” ujar Palui.

“Manyalin kajian siapa maka bisa banar mananambai biniku, imbah ditatambainya lalu pina banyaman awaknya,” ujar Garbus.

“Inya itu tamasuk urang pintar jua, kalu kada pintar pasti inya kada kawa jadi mantri, lima walas tahun sakulahnya talu kali kada naik,” ujar Palui ba-agak baisi kamanakan pintar. emhati(repro)

Sumber: Banjarmasin Post Edisi Cetak, tanggal 18 Januari 2019

Garbus merasa putus asa karena istrinya lama sakit dan tidak sembuh meski sudah berobat ke berbagai orang pintar serta mencoba banyak ramuan tradisional seperti akar tarap, daun belimbing, dan buah…