Kesah Palui : Dilarang Masuk
- 38 kali
Setelah menikah dan memiliki anak, Palui tinggal di rumah sewaan bersama istrinya. Ia berpesan agar tanaman di halaman dijaga dari pencuri. Namun, kambing milik Julak Tambun sering masuk dan memakan tanaman mereka. Meski sudah diusir dan dipukul, kambing itu tetap datang lagi. Kesal, Palui memasang papan bertuliskan “Dilarang Masuk Pasal 551 KUHP” di halaman rumahnya. Saat kambing masih saja datang, Palui melapor ke Julak Tambun dan marah karena tanamannya rusak. Namun, Julak Tambun balik memarahi Palui karena kambingnya luka dipukul. Ia menertawakan Palui yang dianggap lebih bodoh dari kambing, sebab hewan itu tentu tidak bisa membaca tulisan larangan hukum.
*****
IMBAH kawin, baranak saikung, Palui sudah mulai bapisah rumah wan mintuhanya. Inya manyiwa di kampungnya. Halaman luas banyak tanaman tapi kada bakandang.
“Biniku ai tunggui rumah bila aku bagawi,” ujar Palui.
“Kalu bagawi jangan talalu malam buliknya, ulun takutan saurangan di rumah,” ujar bininya.
“Jangan hawatir ding ai, tiap tangah hari aku pasti bulik makan siang di rumah haja,” ujar Palui.
“Syukur ulun kada kasunyian,” sahut bininya.
“Pasanku tiap aku bagawi supaya kabun tamanan sayuran dan lalapan di halaman rumah kita ini dijaga jangan sampai dicuntan urang,” ujar Palui.
“Hi’ih, samalam ada kakanakan maminta lumbuk, tapaksa ulun bari karna bubuhannya handak mamancuk,” ujar bini Palui.
“Kalu urang maminta dan bapadah bari haja. Nang dijaga adalah jangan sampai dicuntan maling,” ujar Palui.
“Nang muar banar adalah tiap siang musti bajurut kambing masukan ka sini dan mamakani tanaman kita. Sudah jua diburu dan disasahi dan dipukul tapi kada lawas datangan pulang ka sini. Sampai muyak,” ujar bini Palui.
“Kambing siapa?” ujar Palui.
“Kambingnya julak Tambun pagawai pambakal. Kaya apa kalu di kandang haja?” ujar bini Palui.
“Kalu dikandang kalarangan biayanya. Kaina kutulisi haja wan aturan hukum. Aku ada mambaca pasal 551 KUHP nang artinya kada bulih masuk kalu kada saizin ampun rumah,” ujar Palui langsung mancari kartun dan manulisi ‘Dilarang Masuk pasal 551 KUHP’.
Kartun batulisan itu dipasangnya di halaman rumah. Isuknya wayah bulik makan bininya bakisah bahwa kambing julak Tambun itu datangan pulang mamakani tanaman kasayangannya.
“Kalu kaya itu aku ka rumah julak Tambun haja, malapurakan bahwa kambignya masuk halaman rumah kita,” ujar Palui mangincang.
“Ui julak Tambun, ulun umpat batakunlah, kambing sampiyan itu kurang ajar samunyaan mamakani tanaman kabun ulun. Padahal sudah ulun pasang tulisan ‘Dilarang Masuk sasuai pasal 551 KUHP,” ujar Palui pina sangar.
“Ooo… jadi ikamlah nang mamukuli kambingku karna babarapa ikung batisnya pina patah,” ujar julak sarik.
“Karna kambing itu kada tahu aturan maka tapaksa ulun pukul, kada tahukah di sana ada pasal 551,” ujar Palui manunjuk.
“Palui, Palui, ikam ini bungul pada kambing Lui ai. Kambing itu kada bisa mambaca, inya kada sakulah makanya biarpun sapuluh aturan dipasang di sana tatap haja dibantasnya tanaman ikam itu,” ujar julak Tambun malah balik handak manuntut Palui karna mamukuli kambing sidin. emhati(repro)
Sumber: Banjarmasin Post Edisi Cetak, tanggal 30 Maret 2019
Setelah menikah dan memiliki anak, Palui tinggal di rumah sewaan bersama istrinya. Ia berpesan agar tanaman di halaman dijaga dari pencuri. Namun, kambing milik Julak Tambun sering masuk dan memakan…
