Kesah Palui : Kada Jadi Bulik

Selama empat tahun merantau ke Sumatera, Palui sangat rindu keluarga dan berniat pulang saat hari raya. Namun, pamannya mengingatkan bahwa tiket dan ongkos mahal, apalagi semua penuh. Palui beralasan ingin mengurus warisan dari tanah yang telah dijual saudaranya. Ia pun menulis surat meminta dikirimi “gambar,” maksudnya uang, dengan bahasa halus. Namun, kakaknya mengirim foto keluarga dan tanah. Palui mengulang permintaan dengan lebih jelas, tapi kakaknya tetap salah paham dan akhirnya menjelaskan bahwa bagian Palui dari warisan sudah habis diambil dulu. Palui pun kecewa dan pasrah, membatalkan niatnya untuk pulang.

*****

SUDAH ampat tahun ini Palui madam ka Sumatera. Makanya wayah paparak hari raya kaina inya baniat handak bulik karna sudah dandaman banar wan anak bini dirumah.

“Kada usah bulik Lui ai, karna kada nyaman-nyaman bulik wayah hari raya, ungkusnya larang wan pasti bakakajalan” ujar nang mamarinanya manangati.

“Ulun bulik kada cuma dandaman wan kampung tapi handak maurus warisan,” ujar Palui baulah alasan.

“Warisan nang mana Lui, kudangar sudah dijual dangsanak ikam,” ujar mamarinanya.

“Kalu tanah pahumaannya sudah dijual, maka kabalujuran ulun handak maambil duitnya,” balas Palui.

“Bulik wayah hari raya ini ngalih banar Lui ai karcis pasawat atawa karcis kapal sudah habis tajual sabulan sabalumnya,” ujar mamarinanya.

Sabulan labih sabalum handak bulik, Palui sudah bakirim surat wan kakaknya minta kirimi duit. Karna inya supan, hidup di Jawa dipadahakan kada baduit maka dalam surat itu Palui manulis halus banar bahasanya.

“Tahun ini ulun handak bulik, tulung kirimi babarapa buting gambar,” ujar isi surat Palui.

Kada lawas datang surat balasan matan kakaknya, di samping bahabar salamatan ada babarapa lambar gambar, yaitu gambar kayi wan nininya wan gambar sakaluargaan.

Karna lain gambar itu nang dimaksud Palui, maka inya mambalasi pulang.

“Gambar kiriman sudah ditarima, tapi lain gambar itu nang dimaksud. Gambar-gambar kayi nini itu sudah baisian. Tulung kirimi gambar lainnya, umpamanya gambar pahumaan nang dijual,” ujar isi surat balasan Palui.

Lalu kakaknya mambalas mangirimi gambar pahumaan wan gambar kabun nyiur.

“Wah… kada pamahaman banar kakak tuha ini, dasar pambabal.

Makanya Palui bakirim surat pulang. Ditulisnya : tulung kirimi gambar hasil bajual pahumaan wan kabun nyiur.

Gambar itu kartasnya tipis haja wan balangnya habang, di bagian mukanya ada gambar dua urang bakupiah. Kalu kada salah di atasnya ada lima bigi gambar hintalu batatai tungkatnya,” ujar isi surat Palui.
“Palui, Palui, ikam dasar mulai bahari ma-akal tarus bila handak minta kirimi duit, kanapa maka kada bapadah tarus
tarang haja. Sabujurnya aku paham haja maksud surat tikam itu, tapi kami kada kawa mambari lagi karna bagian ikam sudah habis diambil wayah ikam tulak ka jawa tadi,” ujar bunyi surat balasan kakaknya.

Palui taungut imbah mambaca surat balasan kakaknya itu, lalu inya bapadah wan mamarinanya.

“Bujur ujar sampiyan jua julak ai bahwa bulik wayah hari raya ini kada nyaman,” ujarnya manutupi kakaciwaannya. (BANJARMASINPOST.CO.ID/rep/tam)

Sumber: Banjarmasin Post Edisi Cetak, tanggal 29 Mei 2019

Selama empat tahun merantau ke Sumatera, Palui sangat rindu keluarga dan berniat pulang saat hari raya. Namun, pamannya mengingatkan bahwa tiket dan ongkos mahal, apalagi semua penuh. Palui beralasan ingin…