Kesah Palui : Kana Celengi

Tulamak mengadakan aqiqah untuk anaknya dan menyembelih dua ekor kambing. Ia menyisihkan kepala kambing untuk Palui yang tak hadir karena ke Banjar. Keesokan harinya, Palui datang meminta maaf, dan Tulamak memberinya kepala kambing itu tanpa tahu bahwa bagian tersebut adalah kesukaan istrinya. Saat istrinya melihat Palui makan dengan lahap, ia marah besar dan menatap suaminya tajam. Palui yang merasa takut segera berhenti makan dan pamit pulang. Tulamak bingung dengan kemarahan istrinya, sementara istrinya makin kesal karena bagian favoritnya justru diberikan kepada orang lain.

*****

TULAMAK manyaru bubuhan kakawalannya Palui, Garbus, Tuhirang wan tukacut, kaina malam basalamatan ma-aqikahi anaknya nang hanyar lahir. Karna anaknya itu lalakian jadi inya manyumbalih dua ikung kambing.

“Kalu kaya itu malam ini kami makan ganal karih kambing,” ujar Garbus.

“Mudahan kami dapat bagian kapalanya,” ujar Tuhirang.

“Kapalanya itu sudah jadi bagian tuan guru,” sahut Garbus.

Imbah tuntung makanan Tulamak mancari’i Palui karna mulai acara baluman mulai sampai tuntung ini inya kada mandangar suara Palui.

“Mungkin kada ikam saru,” ujar Garbus.

“Palui mulai baisukan tulak ka Banjar,” sahut Tuhirang.

“Kalu kaya itu, kapala kambing nang sabiginya cagar kusiapakan gasan Palui,” ujar Tulamak.

Isuknya si Palui datang ka rumah Tulamak handak minta maaf karna malamnya kada kawa datang saruan ba-aqikahan.

“Aku maaf banar samalam kada datang karna tulak ka Banjar mailangi paninian, hari hujan labat tapaksa tapamalam,” ujar Palui.

“Aku maklum haja Lui ai,” ujar Tulamak manyurahakan Palui duduk lalu inya langsung kabalakang ma-ambilakan makanan wan nginuman. “Pas banar Lui ai, ikam kutinggali kapala kambing, silakan makan,” ujar Tulamak.

“Ikam paham banar kasukaanku Mak ai,” ujar Palui sambil mulai makan mahantup utak kapala kambing.

Kada lawas datang bini Tulamak, takajut malihat Palui makan kapala kambing nang disimpannya dalam lamari. Mulai matan higa lawang bini Tulamak babarapa kali mancelengi lakinya, kasarikan kanapa maka kapala kambingnya dimakan Palui. Wayah mancelengi lakinya itu sawat kalihatan ulih Palui, lalu Palui marasa bahwa bini Tulamak sarik maka Palui makin bacapat mahabisakan nasinya.

“Ayu lakasi batambah, nasi masih banyak dan habisakan utaknya,” ujar Tulamak manyuruh Palui.

“Aku sudah kanyang, kulihat langit maram mungkin cagar ada patir,” sahut Palui karna inya maklum sudah babarapa kali kana celengi bini Tulamak.

“Kada usah lakas bulik Lui ai, kada mungkin ada patir karna hari panas banar,” ujar Tulamak karna inya kada paham bininya sarik saceleng-celeng.

Palui langsung badiri, parmisi lalu handak bulik.

“Hadangi-hadangi,” ujar bini Tulamak bagagasakan maacungakan payung. Malihat bini Tulamak pina mahahing maka Palui makin takutan lalu langsung bukah saling lajuan karna mulai matan makan tadi bini Tulamak itu dilihatnya pina saceleng-celeng.

“Kanapa maka ikam handak mamangkung Palui,” ujar Tulamak.

“Aku kada handak mamangkung Palui tapi handak manitipakan payung bininya nang katinggalan di rumah kita,” ujar bini Tulamak lalu mamukulakan ka-awak lakinya karna kasasarikan kapala kambing kasukaannya disurungakan ka Palui. emhati(BANJARMASINPOST.CO.ID/repro)

Sumber: Banjarmasin Post Edisi Cetak, tanggal 15 Juni 2019

Tulamak mengadakan aqiqah untuk anaknya dan menyembelih dua ekor kambing. Ia menyisihkan kepala kambing untuk Palui yang tak hadir karena ke Banjar. Keesokan harinya, Palui datang meminta maaf, dan Tulamak…