Kesah Palui : Kanyamanan Sapat Karing

Kesah Palui : Kanyamanan Sapat Karing

Palui bersama istri dan anak-anaknya akhirnya pulang kampung setelah lima tahun bekerja di Banjar tanpa sempat mudik. Setibanya di rumah, mereka disambut hangat keluarga dan tetangga. Saat makan bersama, Palui menikmati ikan sapat kering dengan cacapan limau kuit yang mengingatkannya pada cita rasa kampung. Ia mengaku makanan itu jauh lebih nikmat dibanding hidangan di kota. Namun, anaknya tanpa sengaja membongkar kenyataan bahwa selama di Banjar mereka hidup pas-pasan, jarang makan lauk mewah. Ucapan itu membuat Palui hanya bisa tersenyum pahit, sadar bahwa kehidupan kota tak seindah yang orang bayangkan.

*****

WAYAH parai sakulahan tadi Palui wan bini dan anak-anaknya bulikan ka banua. Handak jua maubah rasa, sudah ampat lima tahun bagawi di Banjar kada saling bulikan. Alasannya karna sibuk bacari, karna kakanakannya sudah sakulah dan karna balum baisian sangu, maklum hidup di kuta pas-pasan tarus. Ahirnya wayah liburan tadi dipaksakannya jua mudik ka banua karna sudah dandaman.

“Syukur ikam ingat haja wan banua karna kami dandaman jua wan ikam Lui ai, karna ikam ini mulai lagi halus dikenal sebagai undasnya banua,” ujar Garbus mamuji Palui.

“Hi’ih, undas banua itu sama wan huhulu agahnya, aku kada hakun disambat pina pamustinya, pina paharatnya,” ujar Palui langsung manangkis kada hakun dipadahakan undas banua.

Kada lawas bubuhannya badandaman wan bapapanderan, Palui dikiyau mamarinanya mambawai makanan.

“Lui, uiii… Lui, lakasi naik ka rumah kita makanan baimbai-imbai sakaluargaan, bawai Garbus wan Tulamak supaya rami, maklum lawas tapisah,” ujar mamarinanya.

Lalu rami baricau bubuhannya makanan. Ulih mamarinanya disangaakan iwak sapat karing bacacapan limau kuit dan lumbuk rawit padas, makanan kasukaan Palui lagi halus.

“Tapaluh aku kapadasan Mak ai, nyaman banar baiwak karing, talu kali batambah labih gancang pada ikam,” ujar Palui.

“Napanya nang nyaman Lui?” ujar Tulamak.

“Iwak sapat karingnya hambar, cacapannya limau kuit ngalih cariannya di kuta,” ujar Palui.

“Urang kuta itu hidupnya harat-harat, makanannya hayam atawa daging tarus, ruti kiju,” ujar Garbus manyindir.

Mandangar Garbus mamuji abahnya, anak Palui nang panuhanya langsung manyahut, “Wajar haja abah kanyamanan makan nasi iwak sapat karing bacacapan limau kuit karna salawas di Banjar sama sakali kada biasa tarasani iwak sapat karing. Jangankan sapat karing, hayam wan daging gin kada biasa jua.”

“Lalu di Banjar itu napa iwaknya?” ujar Tulamak batakun.

“Kada biasa tarasani iwak karna jarang baiwak, rancak tahu wan tempe haja ditambah pucuk gumbili atawa pucuk kastila,” ujar anak Palui bakisah.

“Itulah risiku madam, dilihat haja nyaman tapi nyatanya penuh suka duka dan pandaritaan,” ujar Palui kada kawa bakaramput lagi karna polos dan jujur dikisahakan anaknya. (mht/repro)

Sumber: Banjarmasin Post Edisi Cetak, tanggal 7 Agustus 2019

 

Palui bersama istri dan anak-anaknya akhirnya pulang kampung setelah lima tahun bekerja di Banjar tanpa sempat mudik. Setibanya di rumah, mereka disambut hangat keluarga dan tetangga. Saat makan bersama, Palui…

Tinggalkan Balasan

Alamat email Anda tidak akan dipublikasikan. Ruas yang wajib ditandai *