Kesah Palui : Sakalinya Tukang Wasi

Palui sudah mencoba berbagai pekerjaan, dari tukang cuci motor hingga pembantu pembakal, tapi tak satu pun bertahan lama. Kini ia mencoba jadi pedagang perantara, berharap bisa mendapat untung dari jual beli mobil bekas. Ia menawar mobil Land Rover untuk dijual pada Haji Ipul seharga enam juta rupiah. Namun, setelah diperiksa, Haji Ipul hanya menawar enam ratus ribu karena hanya butuh mesin dan rangkanya, bukan mobil utuh. Palui terkejut dan kecewa, menyadari dirinya salah paham. Harapan besar untuk untung jutaan pun lenyap, berganti rasa malu dan penyesalan.

*****

MULAI matan halus sampai baranak talu sudah puluhan macam gawian Palui, mulai tukang basuh mutur, jadi karnit, mairingi mutur trak, jadi tukang bica banyu, maujek sampai jadi pambantu pambakal. Mambantu kada ba SK, mambantu mambarasihi kantur kalurahan wan balai desa alias pasuruh. Tapi biarpun kalihatannya pina nyaman karna disanangi ulih pambakal, tatap haja Palui baampih pulang matan gawian tarakhirnya itu.

“Lalu napa nang ikam gawi wayahini Lui?” ujar Tulamak.

“Dalam saminggu ini aku manggani’i mintuha batanam karna banyu pas kacap-kacapan,” ujar Palui.

“Kainanya imbah habis batanam bagawi napa?” ujar Garbus

“Aku handak jadi padagang parantara. Padagang parantara itu mudalnya nyaman banar dan bisa mahasilakan duit,” ujar Palui

“Napa mudalnya Lui?” ujar Garbus.

“Mudalnya adalah pander dan kita dapat kumisi atawa huhujungannya. Sakali ini aku manawarakan mutur pikap, dan masih kawa haja dipakai gasan maangkut barang atawa maangkut pasir,” ujar Palui.

“Siapa nang manukari Lui,” ujar Tulamak.

“Itu nah pak Haji Ipul-nya nang handak manukari, karna samalam kami sudah bajanji bahwa sidin minta cariakan mutur jip merek Landrover ulahan Inggeris,” ujar Palui manunjuk urangnya.

“Barapa haraganya nang pasti Lui, kalu cucuk maka kita bajadian,” ujar Haji Ipul.

“Sasuai haraga wayahini Rp6 juta haja, masih murah apalagi masinnya masih tukcer,” ujar Palui sambil manyuruh itihi awak wan masinnya.

Imbah mamukul-mukul dan mambuka kap masinnya lalu manjinguk ka bawah muturnya, lalu pak Haji Ipul langsung baucap:

“Aju ja kutukari dan sudah kuhitung-hitung, imbah dikurangi 4 bigi ban wan pilangnya maka aku wani Rp500 ribu haja,” ujar Haji Ipul sambil mangatik-ngatik tangan.

“Hau, kanapa murahnya pak Haji? Kanapa maka dikurangi 4 bigi ban wan pilangnya. Kalu dikurangi bannya, mutur ini kada kawa bajalan lagi,” ujar Palui hiran dan bingung.

“Sabujurnya nang kuparlukan adalah awaknya haja wan wasi masin dan wasi bawahnya,” ujar Haji Ipul sambil manaiki tawarannya jadi Rp600 ribu.

“Masya Allah, kukira tadi sampiyan pamburung bangunan gasan maangkut barang sakalinya tukang wasi nang batukar dan bajual wasi tuha,” ujar Palui kakalahan maharap bahujung jutaan sakalinya lucung taharap angin. (mht/rev)

Sumber: Banjarmasin Post Edisi Cetak, tanggal 9 Agustus 2019

Palui sudah mencoba berbagai pekerjaan, dari tukang cuci motor hingga pembantu pembakal, tapi tak satu pun bertahan lama. Kini ia mencoba jadi pedagang perantara, berharap bisa mendapat untung dari jual…