Kesah Palui : Bajanji Mambina

Di kampung Palui baru saja dibentuk koperasi, dan warga mengadakan rapat untuk memilih pengurus. Garbus mengusulkan Palui sebagai ketua karena dianggap jujur dan dapat dipercaya, meski tidak tamat sekolah. Tulamak sempat ragu karena Palui kurang pandai berbicara, tapi Garbus berjanji akan membantunya saat pidato. Setelah terpilih, Palui berpidato dengan penuh semangat dan mendapat sambutan hangat. Namun, ketika Garbus membisikkan janji agar “membina koperasi”, Palui salah dengar dan justru berteriak akan “membinasakan koperasi”. Warga pun marah dan menuntut Palui turun dari jabatan, membuat suasana rapat menjadi kacau dan memalukan.

*****

DI KAMPUNG Palui hanyar haja dibantuk kuperasi. Karna baluman tasusun siapa-siapa pangurusnya, maka disalanggarakanlah rapat gasan pambantukan pangurus wan mamilih katua wan bandaharanya.

“Kita kadada pilihan lagi Mak ai. Kukira sudah cucuk si Palui itu kita usulakan supaya jadi katua kuperasi,” ujar Garbus.

“Sabalum mausulakan supaya dihitung bujur-bujur untung ruginya karna masih banyak nang pintar-pintar,” ujar Tulamak.

“Bujur haja banyak nang pintar-pintar tapi kada jujur, kada kawa diparcaya,” ujar Garbus.

“Hi’ih lah, wayah ini banyak banar pamimpin kita nang pintar, nang harat, nang aksi tapi gawiannya KKN dan pintar manyalewengakan duit nagara,” ujar Tulamak.

“Aku paham haja kawal kita Palui itu kada tamat sakulah. Tapi inya kawa diparcaya, jujur, tabuka dan wani,” ujar Garbus.

“Kalu jadi katua itu harus pintar bapander, bisa bapidatu,” ujar Tulamak.

“Kalu sual bapidatu gampang, kaina aku nang maulahakan pidatunya atau kalu kada aku tukang bisiki dihiganya, pasti beres Mak ai,” ujar Garbus.

Wayah pamilihan katua kuperasi, Palui bujur-bujur tapilih karna disanangi warganya. Wayah pamilihan itu jua langsung diadakan acara pelantikannya. Hadir di sana kapala kuperasi kacamatan, pambakal, tatuha kampung dan katua-katua RT, RW.

“Ikam Lui ai harus pidatu manyatakan tarima kasih dan bajanji mangusahakan kuperasi ini supaya bujur-bujur bamanfaat gasan samunyaan warga kampung kita. Ikam jangan hawatir Lui ai kaina aku barada di balakang ikam,” ujar Garbus.

“Yang terhurmat bapak-bapak dan ibu-ibu sabarataan. Tarima kasih ulun sudah dipilih jadi katua. Ulun bajanji bahwa kuperasi kita ini walau pun baazas kakaluargaan tapi pangurusnya sama sakali kadada bakaluarga, bibas mamarina, bibas dangsanak dan bibas kamanakan, sasuai wan alam demukrasi kita sekarang ini. Apabila kaina ada KKN dan panyalewengan urusan duit atawa urusan barang langsung kita ampihi,” ujar Palui nanga langsung mandapat surakan dan ampikan tangan.

“Harat banar pidatu kawal kita ini,” ujar Tulamak mamuji.

“Tarus Lui, tarus Lui… pidatu ikam baik banar, rakyat katuju banar,” ujar Garbus mambisiki. “Tarusakan Lui bahwa ikam bajanji… cagar mambiasakan mambina kuperasi ini,” tambah Garbus bagamat.

“Napa Bus? Nyaringi sadikit aku kurang mandangar,” ujar Palui sambil maarahakan talinga kaanu Garbus.

“Ikam Lui ai bajanji cagar mambiasakan mambina kuperasi ini,” ujar Garbus banyaring.

“Bapak-bapak, ibu-ibu dan saudara-saudara sekalian…… saya bajanji akan mambinasakan kuparasi ini,” ujar Palui banyaring karna kurang paham bisikan Garbus tadi.

“Palui turun, Palui turun… ampihi jadi katua karna janjinya kada baik, inya bajanji akan mambinasakan kuperasi ini,” ujar hadirin kuriakan manyuruh Palui turun.

“Wassalam dan tarima kasih” ujar Palui himung langsung turun dan basalaman wan hadirin. (mht/rep)

Sumber: Banjarmasin Post Edisi Cetak, tanggal 6 September 2019

Di kampung Palui baru saja dibentuk koperasi, dan warga mengadakan rapat untuk memilih pengurus. Garbus mengusulkan Palui sebagai ketua karena dianggap jujur dan dapat dipercaya, meski tidak tamat sekolah. Tulamak…