Kesah Palui : Dicium Minta Sarak

Kesah Palui : Dicium Minta Sarak

Palui yang biasanya periang tiba-tiba murung selama tiga hari. Garbus yang prihatin mencoba menanyakan sebabnya. Setelah didesak, Palui akhirnya mengaku bahwa istrinya meminta cerai. Garbus dan Tulamak heran karena rumah tangga Palui dikenal rukun. Dengan sedih, Palui menjelaskan bahwa semua terjadi gara-gara ia mencium istrinya. Awalnya mereka mengira masalah sepele, tapi Palui menjelaskan bahwa saat hendak mencium dengan penuh kasih, ruku di mulutnya masih menyala. Api rokok itu mengenai pipi istrinya hingga melepuh dan bernanah selama seminggu. Karena kejadian itu, istrinya marah besar dan meminta cerai dari Palui.

*****

PALUI tamasuk urang nang panggambira, katuju bagaya dan katuju balulucu. Tapi kanapakah sudah talu hari ini Palui pina sadih, katuju mangalamun wan bila digayai kada tapi mau tatawa.

“Lui.. kita sudah bakawan matan lagi halus, maka sakit sanang dan suka duka kita alami basama. Jadi jangan sampai sadih ikam itu disandang saurangan haja. Kisahakanlah napa pungkalanya, bila kawa kubantu atawa paling kada umpat mamikirakan,” ujar Garbus.

“Kukira biar kukisahakanpun ikam pasti kada kawa manulung kasadihanku ini,” ujar Garbus.

“Cuba ungkai, insya Allah ku-usahakan asal jangan urusan duit haja karna akupun kanker alias kantung karing jua,” ujar Garbus.

“Kada urusan duit Bus ai tapi urusan barumah tangga, urusan laki bini,” sahut Palui.

“Oooooo……. jadi ikam bakalahi laki bini. Bakalahi laki bini itu sudah wajar haja karna itulah bumbunya kasih sayang. Dua talu hari imbah bakalahi pasti bamesraan pulang,” ujar Garbus.

“Barat……. barat banar masalahnya,” ujar Palui.

“Kisahakanlah Lui ai, kaina kubantu,” ujar Garbus.

“Ini tamasuk rahasia kalambu Bus ai, jadi ngalih disambat,” ujar Palui.

“Aku bajanji mambantu ikam, kalu parlu kita minta tulung wan tuan guru di Gambut, sidin bisa banasihat,” ujar Garbus.

“Biniku minta sarak, minta talak,” ujar Palui sadih.

“Mungkin ikam karancakan maminta,” ujar Garbus manggayai.

“Aku kada biasa maminta apalagi mamaksa, aku tagantung kahandaknya haja” ujar Palui.

“Lalu napa pasalnya maka sampai bini ikam minta sarak. Sabujurnya sarak itu halal-halal haja tapi justru kada dikatujui malah dibenci Tuhan,” ujar Tulamak umpat manyala pander.

“Biniku minta sarak hanya gara-gara kucium” ujar Palui.

“Wah wah, dunia sudah tabalik. Mustinya, bini bila dicium malah makin sanang banar dan makin cinta”, ujar Tulamak tatawa.

“Aku hiran jua, biasanya inya katuju banar apalagi bila sisingutku mulai labat,” ujar Palui.

“Kaya apa ikam manciumnya, mungkin bakakarasan dan bahimat maigutnya karna kasasayangan,” ujar Garbus.

“Karna kucium itulah maka pipi biniku itu luyuh sampai bangkak bananahan, samingguan ma-arit sakitnya,” ujar Palui.

“Kaya apa ikam manciumnya Lui?” ujar Garbus.

“Daripada aku banafsu banar handak mancium bini, sampai aku kada ingat lagi mamacul ruku banyala dimuntungku……… inya kukuriak kasakitan karna pipinya luyuh kana api rukuku,” ujar Palui pina sadih. (banjarmasinpost.co.od/rep/tam)

Sumber: Banjarmasin Post, tanggal 12 September 2019

Palui yang biasanya periang tiba-tiba murung selama tiga hari. Garbus yang prihatin mencoba menanyakan sebabnya. Setelah didesak, Palui akhirnya mengaku bahwa istrinya meminta cerai. Garbus dan Tulamak heran karena rumah…

Tinggalkan Balasan

Alamat email Anda tidak akan dipublikasikan. Ruas yang wajib ditandai *