Kesah Palui : Salawar Fitnes

Palui dan kawan-kawannya pergi ke kota untuk berbelanja setelah musim panen. Saat mencari pakaian kerja, Palui ingin membeli celana “tanggung”, tetapi penjual bingung karena tidak paham istilah itu. Setelah dijelaskan oleh Garbus bahwa maksudnya celana “setengah tiang”, barulah penjual mengerti dan menawarkan celana olahraga atau “fitnes” tiga perempat. Palui pun membeli celana itu karena bahannya cocok untuk berkebun. Teman-temannya menertawakan karena terdengar seperti Palui ingin berolahraga, bukan bertani. Dengan malu-malu, Palui menjelaskan bahwa celana itu memang untuk kerja di sawah, bukan untuk fitnes.

*****

HARI Ahad tadi Palui wan kakawalannya kaya Garbus, Tulamak wan Tuhirang bajanji handak tulakan ka kuta. Maklum hanyar haja musim katam makanya lagi kancang-kancangnya epok.

Imbah bubuhannya sampai di pasar lalu masing-masing baulanja, ada nang manukar timbaku, gula, asam uyah macam-macamlah.

“Ikam handak manukar napa Lui?” ujar Tulamak.

“Aku handak mancari baju tapung wan salawar gasan bagawi,” sahut Palui, lalu inya masuk ka tuku pakaian sambil batakun:

“Adalah bajual baju kain tapung?” ujarnya.

“Ada ai, macam-macam ukuran dan haraganya,” ujar urang tuku.

“Salawar tanggung pang ada jualah?” ujar Palui.

Panjaga tuku bingung karna kada biasa mandangarnya, lalu inya manjawab: “Kalo salawar tanggung kadada tapi kalo salawar panggung gasan bamanda banyak,” ujarnya.

“Lui, ujar Garbus, padagang itu kada paham salawar tanggung cuba sambat salawar satangah tihang,” pasti inya paham.

“Iya bujur maksudku salawar satangah tihang, panjang kada dan handap kada,” ujar Palui manahapi.

“Ooooo…… kalu salawar tiga parapat nang gasan fitnes atawa gasan baulahraga itu banyak cil ai,” ujar urang tuku.

“Hi-ih bujur, salawar tiga parapat gasan fitnes mancangkul, manajak dan mangatam di pahumaan,” ujar Palui manyalajurakan pander karna inya sudah malihat bahwa salawar fitnes itu adalah salawar tanggung bahan tapung nang handak ditukarnya.

`Imbah babayar lalu Palui kaluar tuku sambil mambawa bungkusan. Kakawalannya nang matan tadi mahdangi di luar kalikikan tatawaan.

“Ikam talalu-lalu bapadah handak fitnes SKJ,” ujar Garbus.

“Aku supan bapadah gawian bahuma,” sahut Palui babisik lalu langsung mambawai bacari makan. (ivd/mht)

Sumber: Banjarmasin Post Edisi Cetak, tanggal 19 Oktober 2019

Palui dan kawan-kawannya pergi ke kota untuk berbelanja setelah musim panen. Saat mencari pakaian kerja, Palui ingin membeli celana “tanggung”, tetapi penjual bingung karena tidak paham istilah itu. Setelah dijelaskan…