Kesah Palui : Rayuan Palui

Palui dan kawan-kawannya menginap di rumah mamarina Palui saat pulang ke kampung. Malam hari, Tulamak terbangun karena mendengar suara Palui seperti sedang berbisik mesra di kamar sebelah. Ia membangunkan Garbus dan menduga Palui sedang merayu kemenakannya yang janda. Keduanya makin yakin setelah mendengar kata-kata Palui yang terdengar seperti rayuan. Namun saat pagi tiba, Palui membantah tuduhan itu. Ia menjelaskan bahwa suara yang mereka dengar hanyalah gumamannya karena digigit nyamuk saat tidur. Tulamak dan Garbus pun malu sekaligus geli menyadari kesalahpahaman lucu itu.

*****

WAYAH bulikan ka kampung halaman, Palui wan kakawanannya bamalam di rumah mamarinanya. Mulanya Bubuhannya handak bamalam di rumah kaluarga masingmasing, tapi mamarina Palui kada mambulihakan.

“Aku dandaman banar wan bubuhan ikam ini karna sudah batahun- batahun kada batamuan. Jadi dua talu malam ini bubuhan ikam harus bamalam di rumahku,” ujar mamarina Palui.

“Kami hakun haja julak ai,” sahut Garbus.

“Makin lawas makin baik,” ujar mamarina Palui.

“Kalu kalawasan maninggalakan rumah di kuta maka kami bisa kahabisan uncui,” ujar Tulamak manyindir.

“Jangan hawatir samunyaan kujamin tamasuk gasan ungkus bulikan. Ikam badua guring di kamar muka dan Palui di kamar subalahnya,” ujar mamarina Palui.

“Tasarah guring dimana haja Julak ai nang panting kawa ma-andak kapala,” sahut Tulamak.

Malamnya imbah rami bapapanderan, lalu masing-masing masuk ka kamar dan guringan. Wayah tangah malamnya Tulamak tabangun karna mandapar bunyi urang bapander bararayuan di subalah kamarnya. Lalu Tulamak mambangunakan Garbus.

“Dangarakan Bus, itu pasti suara Palui bararayuan. Musti inya marayu kamanakannya nang balu itu. Makanya tadi aku curiga kenapa maka kita di pisah kamar. Dangarakan Bus,” ujar Tulamak mambisiki Garbus.

“Ikam dasar talalu banar, manggarayangi dan maigut aku wan bibir. Mungkin karna aku lawas kada guring di sini,” ujar Palui.

“Nah dangarakan bujur bujur Bus, pasti Palui itu marayu kamanakannnya karna lawas kada batamuan,” ujar Tulamak.

“Imbah manggarayangi lalu ikam igut aku sampai puas,” ujar Palui.

“Dasar talalu-lalu banar Palui ini ma-agaki kita. Kita kanyamukan inya malah bararayuan,” ujar Garbus.

“Imbah puas maiguti aku, lalu ikam tinggalakan…,” ujar suara Palui. Baisukkannya, Tulamak wan Garbus mulai mahuhulut Palui.

“Kalu bararayuan dan basalingkuh wan kamanakan kada usah ma-agak kami,” ujar Garbus.

“Bararayuan napa Bus? Kanapa maka aku dituduh babarayuan dan basalingkuh?” ujar Palui takajut.

“Malam tadi kami mandangar suara ikam pina mesra banar, pina bapadah diigut dan digerayangi si Aluh, lalu ditinggalakannya bajauh,” ujar Tulamak.

“Ooo… itukah Mak ? Aku gagarunum itu kada karna bararayuan tapi karna kamumuaran wan nyamuknyamuk nang maiguti aku. Imbah maigut lalu banyanyi pulang ditalingaku,” ujar Palui mambuka rahasianya. (emhati/rep)

Sumber: Banjarmasin Post Edisi Cetak, tanggal 9 November 2019

Palui dan kawan-kawannya menginap di rumah mamarina Palui saat pulang ke kampung. Malam hari, Tulamak terbangun karena mendengar suara Palui seperti sedang berbisik mesra di kamar sebelah. Ia membangunkan Garbus…