Kesah Palui : Manang Manukar

Pasar Tungging kini tidak seramai dulu karena banyak pedagang pindah ke pasar Balauran. Namun, masih ada beberapa yang menjual baju dan celana bekas impor. Palui pun tertarik membeli pakaian bekas dari luar negeri itu. Saat pulang membawa buntalan, Garbus menebak isinya baju dan celana, lalu mereka bercakap soal barang bekas tersebut. Tulamak dengan bangga mengatakan ukuran baju luar negeri cocok dengannya karena tubuhnya besar, berbeda dengan Palui yang kurus. Palui menanggapi bahwa ia membeli baju besar agar kain sisa bisa dijadikan lap. Tulamak mengingatkan bahaya penyakit dari pakaian bekas luar negeri, tapi Palui yakin bisa membersihkannya dengan cara merendam air panas dan menjemur. Ketika dihitung, ternyata biaya membeli dan menjahit ulang sama saja dengan harga baju baru. Namun Garbus menenangkan Palui dengan berkata, “Ikam kada kalah Lui ai, karena masih ada tulisan made in ulahan luar negeri.”

*****

PASAR tungging wayah ini kada kaya dahulu lagi karna bubuhan pasar balauran banyak nang bapindah bajualan ka situ. Tapi amun itih masih ada saikung badua nang masih bajual baju wan salawar bakas matan luar nagri itu.

Ujar habar pasar tungging kada lawas lagi cagar dipindah ka kawasan lain nang kada maulah samrawut wan macit jalan. Karna cagar dipindah itulah makanya palui baistilah batatukar baju wan salawar bakas itu.

“Lui, pina banyak batukar baju salawarlah?” ujar Garbus marawa Palui wayah mambawa puntalan.

“Kanapa maka ikam tahu bahwa nang kubawa ini baju salawar,” sahut Palui.

“Pasti haja aku tahu karna bungkusannya bulat pasti isinya kain, kalu ikam mambawa bungkusan balik kurma pasti sagi ampat,” ujar Garbus kada hakun kalah.

“Aku mamburung, rami banar urang bajualan baju salawar bakas nang sudah jadi,” ujar Palui.

“Oooooo…….. itu baju salawar luar nageri, aku ada jua manukar dua talu pasang. Biar pakaian bakas tapi samunyaan masih hanyar-hanyar babau pabrik,” ujar Tulamak.

“Cucuk hajalah ukurannya wan ikam Mak,” ujar Garbus.

“Samunyaan cucuk haja, pas banar wan awakku karna awakku ganal sama wan awak urang luar nageri,” sahut Tulamak baagak.

“Tapi aku maraguakan wan Palui karna awaknya kurus karimping kaya potlot,” ujar Tulamak pulang mahuhulut Palui.

“Aku paham haja Mak ai bahwa baju salawar matan luar nageri ini ganal-ganal, hitunganku manang manukar, manang haraga karna kainnya banyak, kaina baju salawar itu diupahakan mahalusi, lalu sisa guntingannya kawa diulah kain lap,” ujar Palui.

“Tapi ikam harus hati-hati jua Lui ai, ujar urang bahwa baju bakas urang luar nageri itu bisa babahaya karna di sana rami panyakit AIDS,” ujar Tulamak.

“Gampang haja, ditapas, dirandam banyu panas. dikalantang, dijamur pasti barasih dan mati AIDSnya,” ujar Palui.

“Barapa haraganya salambar Lui?” ujar Garbus.

“Haraganya salambar Rp15.000,” ujar Palui.

“Barapa ungkus maupahakan mahalusi baju salawarnya Lui?” ujar Garbus.

“Ujar tukang jahit karna dirumbak samunyaan maka ungkusnya Rp15.000 salambarnya,” ujar Palui.

“Jadi barapa jumlah haraga salawar wan ungkus mahalusinya Lui?” ujar Tulamak maanyaki.

“Hi’ih-lah, samunyaan jadi tiga puluh ribu rupiah sama wan baulah salawar hanyar,” ujar Palui kakalahan karna salah hitung.

“Ikam kada kalah Lui ai karna masih ada tulisan made in-nya ulahan luar nageri,” ujar Garbus mahimungi. emhati(repro)

Sumber: Banjarmasin Post Edisi Cetak, tanggal 17 November 2019

Pasar Tungging kini tidak seramai dulu karena banyak pedagang pindah ke pasar Balauran. Namun, masih ada beberapa yang menjual baju dan celana bekas impor. Palui pun tertarik membeli pakaian bekas…