Kesah Palui : Gawian Basah

Musim panas panjang meningkatkan risiko kebakaran lahan, termasuk yang sengaja dibakar untuk membuka area pertanian. Palui dan Garbus yang tergabung di BNPBD Kalimantan Selatan aktif membantu memadamkan api bersama petugas BPK setempat. Mereka bekerja gotong royong, menyadarkan masyarakat agar tidak membakar lahan sembarangan dan memahami dampak asap bagi kesehatan. Saat mengunjungi Tulamak, mereka menyiapkan kantung air untuk kegiatan, menyiram kantung kering miliknya agar siap digunakan. Meski Tulamak terkejut, ia ikut berpartisipasi. Kegiatan ini menunjukkan pentingnya kesadaran, kerja sama, dan tindakan nyata dalam menanggulangi bencana serta menjaga lingkungan agar aman dan sehat.

*****

Tahun ini takana lawas musim panasnya. Hal nang kaya ini nang maulah kabakaran lahan tarus saban tahunnya. Ada jua nang basinghaja mambakar lahan gasan bahuma. Ini nang kada bulih. Sudah ada undang undangnya gasan nang basinghaja mambakar lahan, dikanai sanksi kaina. Itu papadah Palui gasan masyarakat.

Palui wan Garbus umpat begabung di BNPBD atawa Badan Nasional Penanggulangan Bencana Daerah Kalimantan Selatan. Makanya bubuhannya bedua rajin banar umpat kagiatan sosial bila ada kejadian bancana alam atawa musibah nang manimpa masyarakat di banua kita ngini.

Pananggulangan bencana nang rancak bubuhannya badua umpati di musim panas ngini cuntuhnya mamajahiakan api akibat kabakaran hutan atawa lahan. Bubuhannya bekerjasama jua lawan bubuhan BPK nang ada di banua kita ngini. Begotong royong mamajahiakan api.

“Mun kita kada aktif Bus ai, kasian masyarakat lawan kula kita jua saban hari mahirup asap,” ujar Palui.

“Bujur banar ikam Lui ai, kita-kita ngini pang nang diharapakan masyarakat, karena kita baisian alatnya. Barasa jadi superhero unda Lui ai,” sahut Garbus.

“Warga masyarakat jua Bus ai mustinya umpat aktif. Makanya kita parlu maingatakan masyarakat. Kita bari panyuluhan tarus, tarutama nang baisian pahumaan atawa kabun jangan mambakar lahannya bila handak batanam. Dampak asapnya tu takana kita sebarataan” ujar Palui sambil mambujurakan kupiahnya nang miring di kapala.

“Salut unda lawan ikam wayah ini Lui ai, pina bapintar,” Garbus bagayaan.

“Makin hari kita musti makin pintar Bus ai. Mun kada dibunguli urang,” balas Palui manyahut.

“Nah, kabalujuran kayapa kita bawai Tulamak umpat bubuhan kita daripada inya baranai aja dirumah,” ujar Palui mambawai.

Garbus satuju lawan Palui supaya mambawai Tulamak. Tuntung acara panyuluhan lawan masyarakat, bubuhannya bahancap tulak karumah Tulamak di kampung sebelah.

Di rumahnya, Tulamak haratan barabah kada sing bajuan. Tangannya kada sing lapasan mamicik hape matan baisukan. Kipas angin gin kada ampih baulai dihiga awak.

“Liwar humapnya hari ini di banua. Di rumah ja tepaluh, apalagi di tanah,” ujar Tulamak menggerunum sorangan sambil bakipas angin.

“Assalaamualaikum, Mak. Napa diulah?,” Garbus mangatuk lawang rumah Tulamak.

“Wa alaikum salaam, masuk Bus,” sahut Tulamak sambil mambujurakan tapih.

‘Napa diulah Mak, pina betapihan aja kada sing bajuan?” Palui batakun pas masuk rumah Tulamak.

“Kantung karing ni, baranai haja unda Lui ai, kada kemana-mana” jawab Tulamak.

“Nah, hakunlah umpat kami, kita mambasahiakan kantung ikam nang karing” Palui mambawai.

“Bujur Mak ae, kami ni rancak banar sudah kantung basah, makanya mambawai ikam jua,” Garbus manambahi.

“Nah, hakun banar unda, nyaman cair lagi,” ujar Tulamak.

“Lakasi ikam beselawar wan bebaju kita langsung ke lokasi,” ujar Palui.

Matan rumah Tulamak marasa himung. Dikiranya cagaran kada karing lagi duit, bisa cair hari itu jua. Tulamak mulai heran pas inya dibawai ka lokasi nang ada mutur tangki banyu. Kada lawas Tulamak tekajut, selawarnya basah disemprot oleh Palui pakai selang banyu. Tulamak langsung takipik baluncat bajauh.

“Nah, ini pang Mak ai gawian kami, maulah kantung ampih karing” ujar Garbus gelahakan tatawa lawan Palui.

“Bah jua, diwaluhinya unda,” ujar Tulamak sangkal. Saharian inya gerunum-gerunum aja. Diakalinya Palui wan Garbus. (Norhasanah, mahasiswi STKIP Islam Sabilal Muhtadin)

Sumber: Banjarmasin Post, tanggal 20 Novoember 2019

Musim panas panjang meningkatkan risiko kebakaran lahan, termasuk yang sengaja dibakar untuk membuka area pertanian. Palui dan Garbus yang tergabung di BNPBD Kalimantan Selatan aktif membantu memadamkan api bersama petugas…