Kesah Palui: Taguringan
- 39 kali
NGARANNYA badiam di kampung, jadi Palui hanyar tahu kalu di Banjar wayah ini ada pulang bioskop hagan menonton pelem.
“Dahulu di Banjar tu bahambur bioskop, ada nang ngarannya bioskop Dewi, bioskop Ria, ada Kamaratih, ada jua Kamajaya, nang paling harat dahulu ada Banjarmasin teater, presiden, wan biskop tuentewan nang di Mitra,” ujar Palui pina harat manyambati bioskop-bioskop nang ada di Banjar.
“Hiih lah sakalinya lawas banar kada suah manonton bioskop. Tarakhir bahari wayah pelem Umanya si Rama nang bajudul satria bagitar,” ujar Garbus maulangi kesah bahari. “Imbah karusuhan 23 Mei wan akibat karisisi moneter, lalu kadada lagi bioskop nang buka.”
Lalu ai bubuhannya batiga bajanjian tulakan ka Banjar hagan menonton bioskop.
Imbah takun sana takun sini ahirnya dapat jua karcis nang pelemnya gin kada tahu rami kadanya. Pokoknya asal manonton haja, supaya kada takaji habar, ujar bubuhannya. Lalu katiganya masuk ke dalam gadung.
“Uma ai, kadapnya!” ujar Tulamak marasa kakadapan.
“Sssttt… Mak… ui Tulamak, kada bulih basuara. Itu nah pelemnya sudah diputar,” ujar Palui managur.
“Kanapa Lui maka kada dibulihakan ribut?” ujar Garbus jua.
“Kasihan nang lain bus ai nang handak manonton,” ujar Palui.
Kikira 2 jam imbah itu pelemnya habis, lampu bioskop nang tadi dimatii dinyalaakan. Pas Palui manjinguk ka subalah, inya takajut. Sebab dilihatnya Garbus wan Tulamak rupanya taguring.
“Uuuiiii.. bangun! larang-larang manukar karcis, bubuhan ikam badua guring haja.
Tahulah kayapa kesahnya pelem tadi,” Palui batakun ka Garbus wan Tulamak.
Garbus takakajut wayah mambuka mata. Inya kebingungan melihat urang nang ada di bioskop sudah bedirian tumatan kursi masing-masing. “Kaya apa pelemnya tadi Lui, rami lah? Napa kesahnya,” Garbus batakun ka Palui.
“Apanya nang rami? Makanya aku tadi batakun wan bubuhan ikam badua nang kaya apa kisahnya,” sahut Palui.
Mandangar nang kaya itu Garbus wan Tulamak kabingungan. “Bah ikam ni Lui ai, maka tadi manonton. Kanapa pulang batakun wan kami badua,” ujar Tulamak.
Palui taumpat jua bingung. “Bah bubuhan ikam ini, parcuma aku mambawai bubuhan ikam badua menonton.”
“Ikam pang kanapa maka kada tahu kesahnya jua?” ujar Tulamak.
“Aku tadi taguring jua. Napa kursinya nyaman banar Mak ai, maka AC nya dingin maulah mangantuk,” ujar Palui.
“Ooo… artinya kita batiga tadi sama-sama taguring jadi kada ada nang tahunya kesah pelemnya,” ujar bubuhannya tatawaan. (bpost/rep)
Kesah ini diambil dari BanjarmasinPost.co.id edisi 2 Januari 2012.
NGARANNYA badiam di kampung, jadi Palui hanyar tahu kalu di Banjar wayah ini ada pulang bioskop hagan menonton pelem. “Dahulu di Banjar tu bahambur bioskop, ada nang ngarannya bioskop Dewi,…
