Kesah Palui: Pukul Rata

WAYAH kadada musim gawian di pahumaan Palui wan kakawalannya sawat jua umpatan malamar jadi patugas kaamanan di pasar kacamatan.

Rupanya karna panitia panarimaan marasa kasihan malihat bubuhannya pina luntang-lantung kada baisi gawian lalu ditarima sebagai sebagai tanaga lapas parcubaan.

“Aku kada paham Lui ai mandangar istilah tanaga lapas parcubaan, karna biasanya bila handak bagawi dan ditarima lalu diandak sebagai tanaga hunur, tanaga parcubaan atawa sebagai tanaga magang,” ujar Tulamak.

“Bubuhan kita ini pantas haja dipadahakan sebagai tanaga lapas parcubaan malah untung kada rugi, karna kada diikat dan satiap saat bisa baampih,” ujar Palui.

“Di samping nyaman baampih, nyaman jua diampihi urang,” ujar Garbus.

“Kalu istilah tanaga lapas parcubaan itu artinya kada diikat maka kita ini bisa jadi sakahandak urang. Dan bisa jua bagawi kada digaji alias sukarila gutung ruyung,” ujar Tulamak.

“Kalu kaya itu pantas haja Palui pina hahing banar bila batugas karna kada musti mandapat gaji,” ujar Garbus.

“Maka itu bisa-bisalah bacari, bila kita baik wan urang maka ada-ada haja razakinya,” ujar Palui.

“Tapi samalam bubuhan padagang hintalu mangadu wan pambakal malapurakan Palui karna inya batugas pina kajam banar, panyarikan banar manyuruh bajauh bubuhan padagang hintalu emperan tuku,” ujar Tulamak.

“Bujurankah Lui?” ujar Garbus manakuni.

“Sabujurannya aku kada karas tapi demi disiplin maka aku tapaksa batindak karna bubuhan padagang itu manutup jalanan urang, lalulintas macet. Makanya aku tawar- manawar wan bubuhan padagang hintalu itu.”

“Karena inya kada hakun bajauh maka tapaksa kukarasi, kutawar hintalunya handak kutukari, barapa haraganya pukul rata halus ganal,” ujar Palui bakisah.

“Kaharatan ikam Lui ai bapadah handak manukari, baiknya bapadah maminta haja Lui ai,” ujar Garbus umpat mahuhulut.

“Karna bubuhannya mahuhulut itulah maka aku sarik, dipadahakannya aku kada mungkin manukari karna kada baduit. Karna aku kada tahan lagi manahan sarikku, lalu bujur-bujur kupukul rata,” ujar Palui marasa manang.

“Pukul rata kaya apa itu Lui?” ujar Tulamak. “Pukuknya… jualan hintalunya kupukul rata, ramuk samunyaan,” ujar Palui.

“Ooooo… jadi pukul rata, dipukuli dan dipacahi hintalunya, kukira tadi pukul rata ditukari,” ujar Garbus.

“Sudah nasibku Bus ai jadi pagawai lapas parcubaan makanya siap dilapas karna gajihnya pun kada mambadai jua gasan hidup saurangan apalagi wan anak bini,” ujar Palui marasa puas. (emhati)

Kesah ini diambil dari koran BanjarmasinPost edisi 4 Januari 2012.

WAYAH kadada musim gawian di pahumaan Palui wan kakawalannya sawat jua umpatan malamar jadi patugas kaamanan di pasar kacamatan. Rupanya karna panitia panarimaan marasa kasihan malihat bubuhannya pina luntang-lantung kada…