Kesah Palui : Garing Mangalilu

Selama seminggu ditinggal istrinya ke Palingkau, Palui jatuh sakit parah — badannya lemah, sering meracau, dan tidak mengenali orang. Semua obat dan doa tidak berhasil menyembuhkannya. Namun begitu istrinya pulang dan menemuinya setelah mandi, Palui tiba-tiba sembuh dan langsung mengenali istrinya. Ternyata “penyakit” Palui hanyalah karena rindu berat pada istrinya. Cerita ini lucu karena menggambarkan kerinduan Palui dengan cara yang berlebihan dan jenaka.

*****

SUDAH samingguan ini salawas ditinggalakan bininya ka Palingkau, samingguan jua Palui Garing kada kaluar rumah. Amun dipadahakan garing bangat kada jua pang. Palui banar garing batuk, salismaan, kapala diatas rasa ngalu, kapala dibawah lintuk layu, nang anihnya muntung kawa haja baruku. Tapi wayah kakawalannya datang bailang inya kada pinandu, bila baucap nangkaya urang lali mangalilu.

Sakali Tulamak wan bininya datang mailangi Palui. Manakuni palui handak makan napa? Palui malah bauling kapala.

“Ikam ini siapa… Aluh Mungkal kah?” ujar Palui wayah malihat bini Tulamak.

“Hau… pian kada pinandu kah wan ulun. Ulun ini bininya Tulamak, bang ai,” ujar bini Tulamak manyahut.

“Astaga… Aku tasalah lihat, kusangka tadinya si Aluh Mungkal. Sama pang langkarnya,” ujar Palui kasasipuan sambil mamusut ka mata.

Kaya itu pang kaadaannya. Kaluarga wan kakawalannya marasa hawatir malihat kalakuan Palui, muntung maracau layau, kalu-kalu mambuang parangai. Sudah babarapa macam ubat dinginum, batatamba wan banyu doa, banyu tawar urang alim, tapi panyakit Palui kada ampih-ampih.

Wayah bini Palui bulik matan Palingkau, lalu dikesahakan kaadan lakinya itu. Bahancap nang bini bulik ka rumah. Imbah tuntung basisigar mandi lalu bagamat diparakinya lakinya itu.

“Ui…abahnya! Pinandu lah wan diaku?” ujar bini Palui masih mamakai handuk balilit di dada.

“Kada… Siapa ikam?” sahut Palui pina lamah.

“Umai lah… kada pinandu wan bini saurang? Ini nah lihat pang!”

Tabalujur handuk di dadanya lului ka bawah. “Nih napa… lihat pang!” ujar bininya manampaiakan.

“Uuu… hi-ih lah hanyar aku pinandu,” ujar Palui tabulalak matanya.

“Napa ngarannya?” ujar bininya.

“Ee…ee…cucu, kakacakan,” ujar Palui handak manjapai. Titik liurnya.

“Uu… jangan… kaina malam haja,” ujar bininya hancap mangacak tangan Palui. Kaduduanya takarinyum. “Nah hanyar katahuan, ngini panyakit lawas manimbul pulang. gara-gara aku tinggalakan sapuluh hari ka Palingkau, lalu garing layau nangkaya mambuang parangai,” ujar nang bini gagarunum dalam hati.

“Syukurlah, tatamba datang, panyakit hilang,” ujarnya bagamat manjumput handuk. (bpost/aan)

Sumber: Banjarmasin Post Edisi Cetak, tanggal 17 Januari 2020

Selama seminggu ditinggal istrinya ke Palingkau, Palui jatuh sakit parah — badannya lemah, sering meracau, dan tidak mengenali orang. Semua obat dan doa tidak berhasil menyembuhkannya. Namun begitu istrinya pulang…