Kesah Palui : Hanyar Ba-HP

Setelah sinyal HP masuk ke kampung, warga beramai-ramai membeli HP, termasuk Palui, Tulamak, dan Garbus. Suatu hari HP Garbus berbunyi, ia mengira ada yang menelpon dan berkali-kali menjawab “halo”, padahal tidak ada suara. Ternyata yang masuk adalah SMS, bukan panggilan. Palui dan Tulamak pun tertawa karena Garbus tidak tahu perbedaan SMS dan telepon. Cerita ini lucu karena menggambarkan kebodohan polos orang kampung yang baru belajar menggunakan HP.

*****

WAYAHINI di kampung Palui hanyar masuk sinyal HP. Mandangar ada sudah toko HP, bubuhannya manukaran jua sabuting saurang. Palui tamasuk pandahulunya baisian pada kawalannya. Imbah itu Tulamak, nang tarakhir baisian HP adalah si Garbus.

“Amun parak sajuta itu ngarannya larang Bus ai,” ujar Palui sambil maaitihi HP Garbus.

“Kurangnya sakitar tujuh ratus ribu Lui ai,” ujar Garbus lihum.

“Baarti haraganya tigaratusan, sama haja lawan ampun kami,” ujar Tulamak.

“Sama haraga, tapi ampunku manang di bunyi lawan gambarnya,” ujar Garbus baagak.

“Wayahini kada usah baagak HP bus ai, nang panting pulsanya banyak, ujar Palui.

“Amun aku paling sadikit manukar pulsa nang isi lima puluh, kada main isi lima ribu,” ujar Garbus baagak pulang.

Kada lawas tadangar bunyi HP ampun Garbus. “Halo… halo, siapa ini? ujar Garbus langsung maandak HP nya katalinga. Lawas inya mandangari, kadada suarannya.

“Halo, halo siapa ni?” ujar Garbus magin banyaring. Lawas kadada nang bapander. Lalu dimatiinya tilponnya.

“Siapa Bus pina sibuk banar ikam,” ujar Palui manakuni siapa nang manilpon.

“Kada tahu jua, limbah kuangkat kadada suara,” ujar Garbus. Kada lawas babunyi pulang HP Garbus. Bunyinya sama lawan nang tadi. Garbus maangakat pulang. “Halo…halo, ada apa?” ujar Garbus. Tuhuk inya manakuni, kadada suara matan HPnya. “Siapa lah nang manilpon, atau Hpnya ni rusak?” ujar Garbus mangguncang HPnya.

“Cuba pang malihat?” ujar Palui.

“Hati -hatilah, kalu bamagin rusak,” ujar Garbus maingatakan.

Kada lawas Palui wan tulamak lucut tatawaan. “Ha… ha pina musti bapander agak, sakalinya kidu jua,” ujar Palui wan Tulamak tatawaan.

“Kanapa ikam manawaakan aku limbah maitihi HP ku?” ujar Garbus kahiranan.

“Nang babunyi tadi itu SMS, kadanya urang manilpon pang,” ujar Palui tatawa.

“SMS tu napa Lui ? ujar garbus rupanya kada tahu.

“SMS tu iya pasan kaya surat masuk ka HP ikam, sms tu dibaca, kadanya didangari ditalinga Bus ai,” ujar Palui manarangakan.

“Makanya kada usah bakoyo dahulu, batakun amun kada tahu,” ujar Tulamak umpat manumpalak Garbus.

“Kaya itukah, tapi aku yakin buhan ikam pamulaan kaya aku jua,” ujar Garbus kada mau kalah. (bpost/fai)

Sumber: Banjarmasin Post Edisi Cetak, tanggal 19 Januari 2020

Setelah sinyal HP masuk ke kampung, warga beramai-ramai membeli HP, termasuk Palui, Tulamak, dan Garbus. Suatu hari HP Garbus berbunyi, ia mengira ada yang menelpon dan berkali-kali menjawab “halo”, padahal…