Kesah Palui : Manyasal Manang

Palui mendukung Spanyol di Piala Dunia dan timnya menang, tetapi istrinya yang mendukung Belanda marah besar karena kekalahan tim kesayangannya. Akibatnya, Palui justru kesal dan menyesal karena kemenangan Spanyol membuat hubungan rumah tangganya jadi tegang.

*****

IMBAH tuntung Piala Dunia nang di Afrika Selatan, Palui pina rancak banar talihat maungut di palataran rumahnya. Tapi, bingung jua pang. padahal inya umpat mandukung Spanyol. Kalihatan pas acara nonbar wan bubuhan kampung di Pos ronda, inya pina paiyanya bakuriak wan baluncat pas Spanyol manang.

Garbus wan Tulamak nang umpat Walanda tuhuk dihulutinya, sampai handak bakalahian. Apalagi, Tuhirang nang jua maingkut Spanyol, umpat-umpatan jua mahabui.

Nang kaya urang nang ampun nagara pang bubuhannya handak bakalahian. Padahal, nyata-nyata, nang manuntun di pos itu, kada urang spanyol atawa Walanda.

Untung ada Pambakal nang manyabari. Jaka kada, katapukan pang buhannya batamparan. “Buhan ikam nih macam-macam haja, pandukung Spanyol wan Walanda di Afrika Salatan haja kada bakalahian, buhan ikam bakalahian lah,” jar pambakal wayah itu.

“Kalah taruhan kada mungkin,” jar Tuhirang bingung malihat Palui taungut.

“Iih, nyata ai kada mungkin, apa nang ditaruhakan, duit kada baisi itu. Mun ada jua, radio buruk nang itu banaham dijualnya,” jar Tulamak manambahi sambil tatawa.

“Wan jua, inya katuju banar wan Spanyol, kada mungkin inya kalah bataruhan,” jar Garbus manimpali.

Panasaran bubuhannya mandatangi si Palui nang mandam tadi. “Kanapa Lui, pina taungut, maka Spanyol manang samalam,” ujar Garbus batakun.

“Aku katuju banar spanyol manang, tapi, aku manyasal kanapa Spanyol manang,” jar Palui manjawab pina pusang.

“Ai, ikam sabujurannya mandukung Balanda kah kaya aku,” jar Garbus manakuni pulang.

“Bah, baapa aku mandukung nagara nang manjajah kita,” jawab Palui sambil marangut.

“Imbah tuh kanapa Lui,” jar Tulamak manakuni pina panasaran.

“Gara-gara manang Spanyol, aku bamasak surangan, manapas baju surangan. Biniku kada tapi mau baingun anak, sampai-sampai digawil tangah malam kada hakun jua,” ujar Palui masam.

“Haw…kanapa jadi kaya itu, Lui,” jar Tulamak makin panasaran.

“Biniku tuh katuju banar wan si Sneijder, pamain Balanda tuh. Inya katuju banar wan gundulnya jar. Jadi, pas Balanda kalah, inya kuhuluti banar,” jar Palui bakisah. “Rupanya, inya sarik banar lalu maraju. Dipandiri kada manyahuti, apalagi pas digawil, pasti majulung balukuk,” ujar Palui pina sadih banar.

“Bah, salah ikam jua Lui ai. Mun kaya itu sabar ai, kalu pina Piala Dunia 2014 kaina Walanda nang manang,” ujar Garbus mahibur.

“Umai, pacang mahadangi ampat tahun lagi, lucut kawan. Baik manang, mun kalah, gawat banar,” jar Palui ta uling kapala. (bpost/ire)

Sumber: Banjarmasin Post Edisi Cetak, tanggal 4 Februari 2020

Palui mendukung Spanyol di Piala Dunia dan timnya menang, tetapi istrinya yang mendukung Belanda marah besar karena kekalahan tim kesayangannya. Akibatnya, Palui justru kesal dan menyesal karena kemenangan Spanyol membuat…