Kesah Palui : Ubat Harat

Kesah Palui : Ubat Harat

Palui dan kawan-kawannya berbincang tentang pengalaman mereka memakai berbagai macam obat, dari jamu tradisional hingga obat modern yang dijual di warung. Mereka saling menertawakan kejadian lucu akibat efek obat yang mereka coba, termasuk pengalaman Palui yang minum obat kuat hingga istrinya kewalahan. Pada akhirnya, mereka sepakat bahwa obat tradisional dari apotek hidup lebih aman, murah, dan tidak berisiko dibanding obat modern.

*****

MUNGKIN karna matan halus sudah tabiasa tahan bagadang, mandi di sungai wan bahujan bapanas di pahumaan maka Palui wan kakawalannya sampai katuha kada panggaringan. Bila garing paling-paling salismaan wan batukan tapi garing nang kaya itupun kada diaritnya. Bila masuk angin dikaruk wan duit bacampur minyak lamak babawang, bila batukan nginum asam kamal, bila sakit parut cukup dikasai minyak gas.

Wayah ini pamarintah maanjurakan tiap rumah di kampung-kampung supaya maulah apotik hidup ujar Palui. Artinya batanam tanaman nang ada hasiatnya gasan kasihatan kaya laos, sarai, tipakan, raja bangun-bangun, kambang kanikir, sup-supan macam-macamlah ujar Palui.

Tapi Lui ai daripada bangalih-ngalih batanam macam-macam labih baik manukar ubatnya haja di warung, asal ada duit beres ujar Garbus.

Bujur ujar ikam itu Bus ai, tapi samalam baminggu-mingu Tuhirang ngalih bakamih lalu inya manukar ubat air mancur. Sakalinya imbah dinginumnya sabungkus haja sudah lucut banar, kada saling ampihan bakamih tarus sampai wayah ini ujar Palui

Napa sababnya Lui maka bisa kaya itu, kasihan Tuhirang.

Sakalinya Tuhirang tanginum jamu air terjun, labih karas daripada air mancur sahut Palui mangalalak tatawa.

Tapi lain pangalaman mintuhaku ujar Tulamak. Mintuhaku itu dianjurakan urang supaya jalan batis santai, tapi kada kawa umpat karna sidin baisian panyakit rematik, sakit tulang. Lalu ulih mintuha bini, sidin disuruh manukar ubat cap tiga batis, eeeee……….sakalinya balum habis satangah lusin sudah kawa bajalan kahulu-kahir bahkan sampai tapamalam di pal 18 ujar Tulamak mambalas pandiran Palui.

Aku parcaya kisah ikam itu, karna akupun mangalami jua sahut Palui. Aku tapakai ilmu Kadir wan Doyok diiklan tivi nang mamadahakan ubat ginseng TL bila dimakan mata tapajam-pajam ka-nyamanan.Sakalinya imbah kucuba, bujur-bujur kaya lampu neon TL banyala tarus siang malam sampai biniku balum saminggu aku mamakan sudah kasarikan minta sarak, ujar Palui.

Kanapa Lui, malah baik kalu basatrum tarus siang malam supaya bini makin sayang ujar Garus batakun.

Nang ditakutani biniku kadanya satrumnya Bus ai tapi ukurannya nang baganal kaya lampu neon.Karna lampu neon banyala tarus, basatrum tarus itulah maka wayah ini aku tapaksa batapih kada kawa basalawar lagi sahut Palui, maangsul kisah Tulamak.

Jadi kalu kaya itu aku akur usul ikam Lui ai supaya kita babulik ka alam mamakan ubat apotik hidup haja, nyaman maulahnya, murah haraganya wan kadada risikunya ujar Garbus. (tam)

Sumber: Banjarmasin Post Edisi Cetak, tanggal 6 Februari 2020

Palui dan kawan-kawannya berbincang tentang pengalaman mereka memakai berbagai macam obat, dari jamu tradisional hingga obat modern yang dijual di warung. Mereka saling menertawakan kejadian lucu akibat efek obat yang…

Tinggalkan Balasan

Alamat email Anda tidak akan dipublikasikan. Ruas yang wajib ditandai *