Kesah Palui : Pucuk Gumbili

Palui yang dulunya pernah jadi kernet dan tukang cuci mobil, akhirnya kembali menjadi sopir setelah lama berhenti akibat kecelakaan yang membuatnya rugi besar. Kini ia memilih jadi sopir pedesaan karena risikonya lebih kecil meski penghasilan pas-pasan. Suatu hari, Palui dan Garbus mengangkut seorang wanita cantik yang turun di Kertak Hanyar tanpa membayar ongkos. Mereka menunggu lama tapi wanita itu tak kembali. Saat memeriksa barang yang ditinggalkan, isinya hanya pucuk gumbili dan kalaras kering. Palui kesal, merasa ditipu, sementara Garbus hanya bisa tertawa menertawakan nasib mereka.

*****

WAYAH kadada gawian lain lagi, Palui tapaksa jadi supir. Kabisaan manyupir ini sudah digawinya lima anam tahun nang lalu dan sudah baisian rebuwis.

Rebuwis itu dimintanya wayah inya jadi karnit, imbah ampat lima tahun jadi tukang basuh mutur. Rebuwis itu hanya sawat dipakainya kurang labih satahun, lalu inya ampih manyupir gara-gara marampak garubak sapi, sapinya patah batis lalu disuruh mangganti saharaga sapi saikungan.

“Gawian manyupir ini nyaman-nyaman sakit, makanya aku parak jara banar.

Karna bila kada hati-hati bisa marampak urang atawa bisa jua disingggul atawa dirampak urang. Marampak atawa dirampak sama haja ganal ruginya. Rugi mangganti, rugi baparkara dan rugi wan nang ampun mutur,” ujar Palui mangisahakan pangalamannya wan Garbus nang jadi karnitnya.

“Ooo … karna pangalaman itulah maka ikam kada tapi baliur lagi jadi supir,” ujar Garbus.

“Makanya tadi kusambat bahwa gawian manyupir ini sakit-sakit nyaman. Ulih karna itu pulalah maka aku mamilih jadi supir padesaan haja supaya jangan talalu barat risikunya, walaupun hasilnya pas-pasaan haja,” ujar Palui.

Wayah tulak matan Gambut tadi, cuma saikung panumpangnya, bibinian pina lamak mungkal, bagincu habang, bagalung tinggi dan babaju kabaya putungan kutabaru nang kalihatan sadikit sasala gugunungannya.

Palui pina makin rancak manyirit kahiga pura-pura maitihi kaca pion, lalu lihum saurangan.

“Ayu Bus bakuriak cari panumpang,” ujar Palui manyuruh Garbus nang duduk di bangku balakang.

“Kertak Hanyar, Kertak Hanyar … Banjar, Banjar,” ujar Garbus kukuriak bahanu sambil takulibi malihat Palui pina asyik banar manyupir mamanderi panumpang bibinian dihiganya itu.

“Aku turun satumat di Kartak Hanyar,” ujar bibinian itu.

Imbah turun matan mutur lalu manyubarang jambatan pasar, tarus kalihatan masuk ka dalam pasar. Palui wan Garbus, lawas banar mahadangi tapi kada cangul-cangul jua.

“Kita dikaramputi dan ditipunya Bus ai, lawas mahadangi dan ungkus mutur kada dibayarinya,” ujar Palui pina manyasal.

“Kada usah manyasal Lui ai dan kada usah marasa rugi karna ikam sudah tuhuk haja manyirit dan manjapai tangannya,” sahut Garbus pina hiri. Sual ungkusnya kada usah hawatir karna ini ada dua bungkusan barangnya nang ditinggal di mutur. Kita anggaplah barang ini pangganti ungkus taksinya,” ujar Garbus.

“Ayu ja Bus ai ada gagantiannya, cuba buka napa isinya, mungkin baju salawar,” ujar Palui manyuruh.

Lalu Garbus lakas mambuka bungkusan itu, pina barat dan pina karesikan bunyinya. “Eee, sakalinya isinya pucuk gumbili wan kalaras karing,” ujar Garbus pina kaciwa.

“Bangsat banar bibinian itu, dianggapnya kita ini kambing tuha nang katuju mamakan daun-daun anum,” ujar Palui umpat sarik sambil gagarunum manyumpah. (Banjarmasinpost.co.id/rep/mht)

Sumber: Banjarmasin Post Edisi Cetak, tanggal 4 Maret 2020

Palui yang dulunya pernah jadi kernet dan tukang cuci mobil, akhirnya kembali menjadi sopir setelah lama berhenti akibat kecelakaan yang membuatnya rugi besar. Kini ia memilih jadi sopir pedesaan karena…