Kesah Palui : Bisikan Gaib

Palui bercerita bahwa ia pernah naik taksi yang penuh sesak hingga merasa mual dan ingin muntah. Saat hampir tidak tahan, seorang penumpang memberinya kantong plastik untuk menampung muntahnya. Karena sudah tidak sanggup menahan, Palui segera membuka jendela dan melempar kantong itu keluar. Namun kemudian ia sadar bahwa suara yang menyuruhnya melempar bukan bisikan gaib, melainkan suara orang yang sedang meminta sumbangan di pinggir jalan. Ternyata kantong yang dilemparnya jatuh tepat ke wadah uang sumbangan orang itu, membuat Palui malu dan teman-temannya tertawa mendengar kisahnya.

*****

LAWAS banar Palui kada manjanguki si Inuy, dangsanak angkatnya nang bagana di Taniran.

“Pabila lagi ikam handak tulakan ka Hulu Sungai, Lui?” Tulamak batakun.

“Kada tahu lagi, bapikir dua kali tu pang kalu handak batulakan,” jawab Palui.

“Kanapa maka salang bapikir dua kali Lui?” ujar Garbus.

“Ikam tahu saurang, aku urangnya kada panahanan bila bajalan jauh, lalu mauk sampai tamuak-muak di dalam mutur?” ujar Palui.

“Kalu aku, alhamdulillah kada suah, apalagi sampai muak, Lui ai,” jawab Garbus.

“Sama ai, Bus ai,” ujar Tulamak.

“Napa garang ikam tu, Lui?”

Lalu Palui mulai baungkai kesah; “Hanyar-hanyar tadi aku mauk sampai tamuak-muak, wayah taumpati taksi nang hibak banar panumpangnya,” ujar Palui.

“Napa mun bilang liwar banar sakitnya. Tuhuk maarit sampai tajalujuk-jalujuk, tapi kada manahan jua. Timbul aku muak, parak siup aku. Untung urang nang duduk di subalah ku, sawat manjulungi kantungan palastik, jadi kada sawat tahambur kamana-mana muaknya,” bamandak satumat Palui sambil mambujurakan sila.

“Antara guring lawan kada, rarawaian aku mandangar suara gaib nang mambisiki; timbai haja, gugurakan haja, sambil liwat sambil manimbai, jangan supan-supan.

Kada sawat bapikir napa-napa lagi, hancap ku buka kaca mutur. Sing gancangan ku timbai kantungan palastik tadi.”

“Imbah itu pang dimapa, Lui?” parak tapaimbai Tulamak wan Garbus batakun.

“Imbah mutur sudah jauh, aku hanyar haja kaganangan.

Sakalinya suara nang manyuruh timbai haja tadi lainan bisikan gaib, tapi suara urang nang bapintaan di pinggir jalan.

Wan jua, kantungan palastik nang ku timbai tadi, pas banar tabuat ka tangguk wadah buhannya mananai duit sumbangannya,” ujar Palui kasisipuan saurangan.

Kalangkangan Tulamak wan Garbus manawaakan kesah Palui.

“Untung kada takana muha bubuhan nang bapintaan itu Lui lah,” ujar Garbus.

“Pacah ha pulang palastiknya di muha urang nitu.”

“Kada maalang-alang lagi sakali manyumbang. Wani manimbai saisi paparutan,” sahut Tulamak baingkut parut manahan tatawa. (banjarmasinpost.co.id/bpost)

Sumber: Banjarmasin Post Edisi Cetak, tanggal 12 Maret 2020

Palui bercerita bahwa ia pernah naik taksi yang penuh sesak hingga merasa mual dan ingin muntah. Saat hampir tidak tahan, seorang penumpang memberinya kantong plastik untuk menampung muntahnya. Karena sudah…