Kesah Palui : Mambawa Gunung Dua Bigi
- 40 kali
Di warung acil Irus, Palui, Tulamak, dan Garbus biasa berkumpul sambil berbincang ramai, terutama tentang babinian. Suatu hari mereka membahas perempuan yang ingin jadi polwan. Tulamak menilai perempuan tetap harus di rumah, tapi Palui menanggapinya dengan kelakar bahwa perempuan lebih kuat karena bisa membawa “gunung dua biji,” sedangkan laki-laki hanya membawa “hintalu dua biji.” Ucapan itu membuat semua tertawa, sementara acil Irus yang merasa tersindir jadi kesal. Perdebatan berubah jadi canda, menampilkan suasana akrab dan lucu khas pergaulan Palui dan kawan-kawan di warung tempat mereka biasa bertukar gurauan.
*****
KALU takumpulan, bubuhan Palui, Tulamak, Garbus di warung acil Irus, pasti bubuhannya ja nang bapander. Warga nang lain jadi pandangar haja. Apalagi bila sudah bahual babinian, bilang raminya hual bubuhannya.
“Amun sahari kada mamander babinian, bisa garing kalu Lui lah?” ujar acil Irus.
“Pian cil ai, cukup jadi pandangar satia kami, nang panting limbah makan minum kami bayar. Iya kada Lui?” ujar Tulamak manyahutakan.
“Bujur banar Mak ai, mun marasa tasinggung, baranai …ha.ha. : ujar Palui tatawa.
“Kaya apa baranai, mun bubuhan ikam muntung lanji-lanji,” ujar acil Irus kasarikan.
“Kita tadi sampai dimana Mak? Acil ni pang tukang pagat pander urang,” ujar Palui.
“Kita tadi mamander si Jubai nang handak jadi polwan, inya kada hakun kalah lawan lalakian wayah ini,” ujar Tulamak.
“Amun manurut aku inya kada cucuk jadi polwan, sabab biar harat harat jadi polwan, inya tatap haja babinian nang maurus rumah tangga,” ujar Tulamak.
“Nang pasti tatap haja kadudukannya dibawah, iya kada?” ujar Palui lihum
“Balum tantu Lui ai, banyak babinian wayahini katuju baduduk di atas,” ujar Tulamak mamulai balalanji.
“Mulai pulang buhan ikam bapander lanji,” ujar acil Irus panas talinga mandangar.
“Acil Irus kaingatan kalu Lui ai,” ujar Garbus manaawakan acil Irus nang kasarikan.
“Tapi aku sapandapat lawan Tulamak Bus ai, babinian tu sabujurnya kuat matan bahari, kada wayahini haja pang?” ujar Palui.
“Kuat napanya Lui, kuat maminta duit?” ujar Garbus kada sapandapat.
“Cubai ikam itihi babinian lawan lalakian, pasti kuat babinian pada lalakian.”
“Napa buktinya Lui?” ujar Tulamak maanayaki.
“Buktinya, inya kawa mambawa gunung dua bigi, kita lalakian napa? cuma kuat mambawa hintalu dua bigi, itu gin ditulungi lih burung,” ujar Palui tatawa mangalakak pulang.
“Bujur banar, bujur banar, aku sapandapat lawan ikam Lui ai. Contohnya acil Irus, sudah parak tiga puluh tahun maarak gunung kada uyuh-uyuh jua,” ujar Tulamak.
“Muyak bubuhan ikam ni, mun kusurung gunungku ini pasti barabut batitiga,” ujar acil Irus tambah kasarikan. Buhannya batambah bahimat tatawan. (banjarmasinpost.co.id/bpost/fai)
Sumber: Banjarmasin Post Edisi Cetak, tanggal 15 Maret 2020
Di warung acil Irus, Palui, Tulamak, dan Garbus biasa berkumpul sambil berbincang ramai, terutama tentang babinian. Suatu hari mereka membahas perempuan yang ingin jadi polwan. Tulamak menilai perempuan tetap harus…
