Kesah Palui : Bau Iwak Karing

Palui jadi bahan ejekan warga karena tali salawarnya putus, membuatnya malu. Ia bertekad mengikat salawar dengan kuat agar tidak terulang. Saat pengajian malam, guru Jain membahas pentingnya kebersihan lahir batin untuk sahnya ibadah. Di tengah salat Isya, seekor kucing masuk ke tapih Garbus, membuatnya bingung dan lama sujud. Setelah salat, Garbus gelisah karena kucing itu keluar dari bajunya. Palui tertawa keras, menganggapnya sebagai balasan karena dulu Garbus menertawakannya. Suasana menjadi lucu dan hangat, memperlihatkan keakraban dan canda khas mereka di kehidupan sehari-hari.

*****

Limbah Palui pagat tali salawar samalam, rami urang di kampung mamanderakan. Bila rahatan badapatan di jalanan, pasti urang managur ka Palui.

“Pasti buhan ikam ini nang bakisah ,” ujar Palui kasarikan. “Rupanya bubuhan ikam katuju malihat aku kasupanan lah, ada haja kaena balasannya hari kiamat,” ujar Palui manunjuk Garbus wan Tulamak.

“Tapi tatap haja kalu kita malam ini baimaman di langgar?” ujar Tulamak.

“Nyata haja pang, tali salawarku sudah aman, sudah kujarat mati,” ujar Palui.

“Amun dijarat mati musiah ikam handak bakamih Lui?” ujar Garbus maingatakan.

“Kawa haja matan higa basusup, aku kada pakai salawar dalam jua,” ujar Palui kada hakun kalah.

Parak Magrib bubuhannya takumpulan kaya biasa sambahyangan Magrib. Limbah sambahyang babacaan wirid lalu badoa. Kada lawas guru Jain bacaramah pulang.

“Kaya apa Lui tali salawar ikam pisit haja kalu sudah?” ujar guru Jain manggayai Palui.

“Aman haja guru ai, kada hakun lagi ulun sial dua kali,” ujar Palui lihum saurangan

“Nah malam ini kita satumat mambahas kabarsihan. Amun sambahyang handak sah, kita harus suci lahir atawa batin,” ujar guru Jain.

“Contohnya kaya apa guru?” ujar Tulamak batakun

“Artinya kita barasih awak, hilang lawan hadas kacil atawa ganal. Hadas tu kaya kita bakamih, harus dibarasihi,” ujar guru manyambung.

“Hadas ganal pang kaya apa guru?” ujar Garbus.

“Hadas ganal iya urusan kita laki bini, jadi harus mandi junub,” ujar guru lagi.

Limbah tuntung babacaan, buhannya sambahyang Isya. Tabalujuran kucing masuk manuju ka tapih Garbus, tabarungan urang rahatan sujud tarakhir. Bingung Garbus handak duduk. Lawas inya sujud kada sing dudukan, tapaksa inya badudi pada imam.

“Kanapa ikam tadi,” ujar Palui.

“Kadapapa Lui ai, ujar Garbus kada hakun bakisah. Tapi inya pina ngalih tatap baduduk.

“Banyak banar kah doa ikam jadi pina lawas sujud tarakhir?”

“Iya ai kalu,” ujar Garbus masih galisah duduk lalu badiri, sakalinya kucing tadi kaluar matan tapih.

“Ha…ha… tabalas kisahku, nyata haja ah kucing masuk ka tapih Garbus, dikira kucing bau iwak karing, sakalinya salawar dalam kada batapas samingguan,” ujar Palui bahimat manawaakan. (bpost/fai)

Sumber: Banjarmasin Post, tanggal 17 Maret 2020

Palui jadi bahan ejekan warga karena tali salawarnya putus, membuatnya malu. Ia bertekad mengikat salawar dengan kuat agar tidak terulang. Saat pengajian malam, guru Jain membahas pentingnya kebersihan lahir batin…