Kesah Palui : Pamilihan Pambakal, Bagian Pertama
- 41 kali
Palui berambisi mencalonkan diri sebagai pambakal di kampungnya, merasa yakin bisa menang meski sudah tua. Namun, Tulamak mengingatkan bahwa calon harus lulus tes membaca, menulis, dan berhitung. Untuk membantu, Palui meminta keponakan Garbus, Rahmat, duduk di belakangnya saat tes agar bisa memberi isyarat jawaban. Saat ujian berlangsung, Palui menyontek gerakan Rahmat untuk membaca kata di papan tulis. Namun ketika kata “CINCIN” muncul, Palui salah paham dengan isyarat Rahmat dan menjawab dengan kata yang berkonotasi salah. Akibatnya, semua orang tertawa, membuat suasana tes menjadi kacau dan lucu.
*****
DI kampung Palui saminggu lagi diadakan pamilihan pambakal. Pamilihan pambakal ini langsung dipilih oleh warga kampung. Tapi sabalumnya, calon pambakal harus lulus administrasi dahulu tamasuk di tes kapintarannya oleh bubuhan kalurahan.
Supaya kada manyupani. Kaya apa Lui jadi haja kalu umpat pamilihan pambakal? ujar Garbus manakuni Palui.
Nyata haja aku jadi umpat, aku ini tamasuk tukuh tuha jua di kampung ini, aku yakin kawa manang, ujar Palui.
Ikam jangan takabur Lui ai, biar tuha amun kada bisa mambaca manulis bahitung, kada lulus tes pamulaan, ujar Tulamak.
Bubuhan ikam ini mandukung aku kada? pina kada baik pamanderan, ujar Palui sarik.
Aku mandukung nyaman jua kawan dapat sawabnya, ujar Tulamak.
Nah.. Kaya itu ngarannya bakawan, isuk suruh Rahmat kaponakan ikam nang sakulah SMA itu umpat aku mahadapi tes pambakal. Inya duduk di balakang haja, tapi malam ini suruh ka rumahku dahulu, ujar Palui manyuruh Garbus.
Inya pasti hakun, asal ada money nya, ujar Garbus.
Isuknya di kantor kalurahan Palui maumpati tes wawancara.
Garbus, Rahmat wan Tulamak dudukan di balakang.
Siap kah Lui pian? ujar panguji manakuni. Siap banar tumatan tadi, jawab Palui.
Pian bisa mambaca lah? ujar panguji lagi.
Bisa, napakah pian surungi bacaannya, aku siap haja ujar Palui baagak Ni kutulis di papan tulis, ujar panguji manulis tulisan MATA. Ni napa bacaannya Lui? ujar panguji.
Si Palui pura-pura bapikir malirik ka Rahmat, lalu tangan Rahmat manuju ka mata.
Mata, ujar Palui.
Lalu panguji manulis HIDUNG.
Palui malirik ka Rahmat pulang. Rahmat mamicik hidungnya. Palui paham lagi
Sutil… itu tulisannya HIDUNG, ujar Palui.
Panguji lalu manulis CINCIN.
Palui malirik lagi. Rahmat lalu maulah bulatan di jarinya, limbah itu jari talunjuk sabutingnya dilurusakan lalu dirasukakan lawan jari nang malingkar tadi mambari kode. Bingung Palui handak manjawab atau kada.
Napa Lui, kada tahukah bacaannya napa? ujar panguji malihat Palui bingung.
Ulun tahu haja itu bacaannya napa, cuma supan manjawab, ujar Palui lagi.
Kada usah supan, jawab haja, ujar panguji.
Jangan salahkan ulun lah, ulun pakai bahasa lain haja nah…itu bacaannya bahubungan lawan gawian kita laki bini saban malam, baulah anak, ujar Palui supan-supan. Geger urang tatawan.(bersambung) (banjarmasinpost.co.id/rep/fai)
Sumber: Banjarmasin Post Edisi Cetak, tanggal 18 Maret 2020
Palui berambisi mencalonkan diri sebagai pambakal di kampungnya, merasa yakin bisa menang meski sudah tua. Namun, Tulamak mengingatkan bahwa calon harus lulus tes membaca, menulis, dan berhitung. Untuk membantu, Palui…
