Kesah Palui : Jamban Baluang

Palui gemar membaca koran dan selalu mengikuti berita terbaru. Suatu hari, ia dipanggil ke balai desa bersama warga untuk menghadiri penyuluhan tentang kebersihan dan rencana penghancuran jamban di pinggir sungai demi penilaian Adipura. Semua warga setuju, kecuali Palui yang tampak sedih karena merasa kehilangan tempat “bersejarah”. Tulamak menggoda bahwa jamban Palui penuh kenangan karena sering digunakan untuk mengintip orang mandi. Akibatnya, para istri marah besar dan menuduh suami mereka ikut berbuat sama. Suasana rapat pun berubah heboh, penuh tawa dan pertengkaran kecil antara para suami dan istri.

*****

PALUI katuju banar mambaca surat kabar, apalagi amun ada habar masalah banua, pasti itu nang dibacanya badahulu. Inya kada hakun kalah jua lawan buhan pajabat nang saban baisukan katuju mambaca barita.

Rahatan asik mambaca,tulamak wan garbus datang mancungul.

“Umai kawal kita ni dasar harat, kaya urang kuta jua baisukan minum kopi lawan mambaca surat kabar,” ujar Tulamak managur.

“Bubuhan ikam napa habar pina sungsung bailang ka rumahku?

“Kami mambawai amanat matan pambakal Lui ai, ujar sidin amun kawa wayah ini jua kita bakumpul di balai desa. Bawai jua bini ikam. Ada panyuluhan matan kalurahan gasan panilaian adipura,” ujar Garbus mamadahi pasan pambakal. “Urusan jamban samalam jua,” ujar Tulamak manyambung.

Sakalinya banyak warga nang datang handak tahu masalah jamban nang handak di hilangkan itu.

“Kaya apa bubuhan pian, akur haja kalu, amun babuang hajat kada lagi ka sungai? Nang jadi masalah wayahini jamban kada cucuk lagi ditangah kuta kaya kita ini. Salain itu marusak pamandangan,” ujar lurah manakuni warga.

“Mun ulun akur haja lurah ai, cuma palui pina kalihatan sadih mandangar jamban handak dihancur,” ujar Tulamak mamadahi lurah

“Hau, kanapa Lui ikam sadih?”

“Ulun Lurah ai sadih karna kada kawa lagi sakahandak bacipui mambasuh burit,” ujar palui mambari alasan.

“Aku tahu ai kanapa Palui sadih amun jamban dihancur,” ujar Tulamak

manyirit ka Palui.

“Kanapa Mak?” ujar Garbus manahapi.

“Jamban Palui tu banyak kenangannya, bayak luangnya,” ujar Tulamak

kakalakak tatawa mambuka rahasia palui.

“kaya itukah, pantas haja pina sadih,” ujar Lurah lihum mandangar.

“Bubuhan ikam jangan lempar batu tangan di simpani nyatanya balangnya sama haja. Siapa nang rancak umpat mahintip?” ujar Palui kada hakun dikarubuti surangan.

Mandangar jamban baluang, bubuhan babinian hamuk barataan. Tamasuk jua bubuhan bini Palui, bini Tulamak wan bini Garbus.

“Baarti amun kami mandi dijamban parak rumah Palui, buhan ikam nang

katuju mahintipkan,” ujar bini tulamak sarik mangibiti ka awak lakinya saurang.

“Pian ni dasar lanji taka tuha, hancur haja pa lurah ai jamban-jamban di sini,” ujar bini Palui jua mangibit lakinya.

“Pian abahnya sama haja kalakuan,” ujar bini garbus mangibit ka lakinya.

Malihat kalakuan buhannya , Tukacil manyalutuk: “Kaya di sinetron

suami-suami takut istri.” Geger orang tatawaan maliahatakan bubuhan Palui bakalahian laki bini. (banjarmasinpost.co.id/bpost/fai)

Sumber: Banjarmasin Post Edisi Cetak, tanggal 22 Maret 2020

Palui gemar membaca koran dan selalu mengikuti berita terbaru. Suatu hari, ia dipanggil ke balai desa bersama warga untuk menghadiri penyuluhan tentang kebersihan dan rencana penghancuran jamban di pinggir sungai…